Pájina aktualizada iha 01:38h, domingu 23 Setembru

ONU alerta ba "efeitu katastrófiku" iha humanidade hosi inséndiu sira iha Amazónia

09 de Setembro de 2019, 22:27

ONU alerta ona iha loron-segunda ne'e ba "efeitu katastrófiku iha humanidade" hosi sunu sira ne'ebé maka kontinua akontese iha Amazónia, hodi admiti katak nunka hatene loloos nia magnitude ka númeru hosi mate sira ne'ebé maka bele akontese hela.


Iha nia diskursu hosi abertura ba Konsellu Direitu Ema nian, ne'ebé akontese durante semana tolu tuirmai, iha Jenebra, Komisária Aas hosi ONU nian ba Direitu Ema nian, Michelle Bachelet, hatudu nia "preokupasaun maka'as" ba "aselerasaun drástika" hosi desflorestasaun Amazónia nian.

"Inséndiu sira iha ai-laran tropikal bele iha impaktu katastrófiku ida iha humanidade hanesan ida de'it, maibé efeitu aat sira sei sente hosi feto sira, mane sira ho labarik sira ne'ebé hela iha área sira ne'e - inklui povu indíjena barak", nia alerta.

"Ne'e hanesan situasaun ida ne'ebé laiha nasaun ida, instituisaun ka líder polítiku ida bele hadook", Bachelet hatutan no iha nia ajenda serbisu nian iha prioridade ba rekoñesimentu hosi mudansa klimátika sira hanesan fonte hosi violasaun todan sira hosi direitu ema nian.

Responsável ONU nian fiar katak "bele la hatene númeru total hosi vítima mortal sira ho estraga sira ne'ebé mosu iha semana hirak ikus ne'e iha Bolívia, Paraguai ho Brazil".

Tanba ne'e, nia enkoraja autoridade sira hosi nasaun sira ne'e hodi garanti "implementasaun hosi polítika ambiental sira ho prazu naruk no sistema sira insentivu nian ba jestaun sustentável, hodi evita nune'e trajédia sira iha futuru".

Iha kontestu ne'e, Bachelet denunsia ona multiplikasaun hosi atake sira hasoru ativista ambiental sira nune'e mós kontra sira ne'ebé defende direitu sira hosi povu indíjena sira.

"Ha'u sentri triste ho violénsia ne'e no mós ho atake verbal sira hasoru joven ativista sira hanesan Greta Thunberg ka sira seluk", nia hatete.

Joven ativista sueka Thunberg, ne'ebé agora daudaun lidera protestu juvenil sira iha sede ONU nian, iha Nova Iorke, hetan beibeik atake verbal sira liuhosi rede sosial sira.

Lusa

 


Comentários

Critério de publicação de comentários