Pájina aktualizada iha 01:40h, domingu 23 Setembru

Atake hasoru estranjeiru sira iha Áfrika-Súl afeta ema mosambikanu na'in 500 resin

10 de Setembro de 2019, 23:01

Violénsia ne'ebé maka dura ona semana ida resin hasoru ema estranjeiru sira iha Áfrika-Súl afeta ona ema mosambikanu sira na'in 500 resin, anunsia hosi Ministériu Negósiu Estranjeiru ho Koperasaun (Minec) mosambikanu iha loron-tersa ne'e iha Maputo.


"Hosi informasaun sira ne'ebé iha, ami iha ema na'in 500 resin maka afetadu ho situasaun", hatete hosi Geraldo Saranga, porta-vós hosi Minec, iha deklarasaun sira ba jornalista sira.

Geraldo Saranga adianta ona katak ema mosambikanu na'in 400 resin hatudu interese hodi fila ba nasaun, iha prosesu repatriamentu voluntáriu ida ho autoridade mosambikanu sira kria hela kondisaun sira hodi bele halo repatriamentu.

Susar iha prosesu repatriamentu akontese ho kazu sira hosi ema mosambikanu sira ne'ebé maka tenki sai hosi sira nia uma no agora iha sentru sira akomodasaun nian no laiha dokumentasaun.

"Ami iha esperansa maka'as katak kontinjente dahuluk bele to'o iha nasaun iha loron-segunda maibé tenki halo uluk kadastru no ne'e hanesan prosesu ida ne'ebé kleur", hatete hosi porta-vós Minec nian.

Governu mosambikanu kalkula katak to'o loron-kuarta sei iha kondisaun sira hodi simu vítima sira hosi xenofobia no sentru tránzitu ida ne'ebé maka kria ona iha distritu Moamba, provínsia Maputo, ho infraestrutura sira, bee ho produtu sira hijiene nian.

Geraldo Saranga apela ona ba ema mosambikanu sira hodi la halo vingansa hasoru atake sira ba ema estranjeiru sira iha Áfrika-Súl tanba Mosambike hakarak jestaun pasífiku ida hosi konflitu sira.

"Ha'u fiar iha plataforma ida diálogu nian ne'ebé sei hamosu solusaun definitivu ida", nia hatete.

Porta-vós hosi Minec asinala katak violénsia xenófoba iha Áfrika-Súl la hamosu susar iha relasaun sira hosi nasaun rua.

Informasaun ofisial ikus sira hosi autoridade súl-afrikanu indika katak ema na'in 12 mate ona hanesan vítima hosi xenofobia iha nasaun ne'e, inklui ema estranjeiru na'in ida ne'ebé la fó sai nia nasionalidade.

Lusa

 


Comentários

Critério de publicação de comentários