Pájina aktualizada iha 01:40h, domingu 23 Setembru

Mate ona eis-Prezidente indonéziu Habibie, ne'ebé permiti ona independénsia Timor-Leste nian

11 de Setembro de 2019, 22:46

Antigu Prezidente Indonézia nian, Jusuf Habibie, ne'ebé permiti ona referendu indepedénsia iha Timor-Leste no hahú ona reforma demokrátiku sira hafoin rejimi Suharto nian monu, mate ona iha loron-kuarta ne'e ho tinan 83, iha hospital ida iha Jakarta, konfirma ona hosi família.


Habibie tama iha hospital iha inísiu fulan ne'e, iha hospital militar ida iha Jakarta, iha unidade kuidadu intensivu nian, ho problema fuan nian.

Antigu Prezidente ne'e hetan eskolla hodi lidera Indonézia hafoin rejimi hosi ditador militar Suharto (1967-1998) monu, inaugura reforma oioin ne'ebé halo nasaun la'o ba demokrasia.

Habibie sai koñesidu mós iha nível internasional tanba permiti ona referendu ida ne'ebé hili ona hosi ema barak independénsia Timor-Leste nian, iha tinan 1999, iha eleisaun ida livre ho demokrátiku, maski desizaun hodi hasai tropa indonéziu hosi antiga kolónia portugeza ne'e, iha tinan hanesan, hamosu krizi polítika ho sosial ida, situasaun ne'ebé mosu hafoin proklama hanesan Estadu independente ida.

Habibie moris iha sidade Parepare, iha illa Maluku, no sai hanesan prezidente datoluk dezde independénsia Indonézia nian (iha tinan 1945), hodi troka Suharto no promove reforma sosial sira, polítika sira ho ekonómika sira ne'ebé loke ona dalan ba rekuperasaun hafoin krizi finanseiru aziátiku nian iha tinan 1997.

Prezidente Habibie, ne'ebé Suharto nomeia nu'udar visi-prezidente fulan rua antes nia lakon, halo ona mudansa maka'as sira iha elite polítika indonéziu, hodi tenta trava problema sira iha tinan ikus sira hosi rejimi ditatorial nian.

Enjeñeiru aeronáutiku ho patente hamutuk 40 resin ne'ebé rejistadu, Habibie emigra ona ba Alemaña ho tinan 19, ne'ebé liutiha tinan 10 kompleta ona doutoramentu ida iha enjeñaria no serbisu ona ba empreza aeroespasial alemaun Messerschmitt-Bolkow-Blohm (MBB), ne'ebé halo parte hosi konsórsiu Airbus nian.

Habibie nia kareira polítika hahú iha tinan 1974, nu'udar konsultor Suharto nian, belun hosi família dezde dékada 1950, no iha tinan 1978 renunsia hosi nia serbisu iha Alemaña no aseita nia kargu nu'udar ministru Teknolojia ho Investigasaun nian hodi lansa projetu oioin hodi aumenta kapasidade teknolójiku Indonézia nian.

Iha tinan 1990, bainhira Suharto hahú diminui nia polítika represivu ho hakbesik ba Islaun, Habibie harii Asosiasaun Indonézia hosi Musulmanu Intelektual sira, iha nasaun ida ne'ebé 88% hosi populasaun hamutuk millaun 265 hanesan musulmanu.

Lusa

 


Comentários

Critério de publicação de comentários