Pájina aktualizada iha 03:09h, kuarta-feira 21 Novembru

Polísia indonézia kaer ema na'in 185 tanba deskonfia provoka inséndiu iha nasaun

16 de Setembro de 2019, 21:43

Polísia indonézia kaer ona ema na'in 185 ne'ebé deskonfia provoka inséndiu sira ne'ebé maka hamosu kalohan maka'as hosi suar tóxiku iha rejiaun, hodi prejudika kualidade ar nian no perturba ligasaun aéreu sira.


"Iha total, ami halo ona investigasaun ba ema na'in 185 no empreza haat", hatete hosi porta-vós hosi Polísia Nasional, Dedi Prasetyo, ba repórter sira iha Jakarta.

"Polísia indonézia sei aplika lei ba ema ruma ne'ebé maka sunu ai-laran ka rai sira, ho intensaun ka ho neglijénsia", hatete hosi Prasetyo.

Indonézia mobiliza ona bombeiru na'in 9.000 resin ho soldadu sira ho helikópteru sira hodi tenta hapara inséndiu sira ne'ebé maka akontese iha ai-laran tropikal sira iha Sumatra no mós iha Kalimantan.

Iha semana liubá, autoridade sira taka ona plantasaun sanulu resin ne'ebé maka afetadu hosi inséndiu sira, hodi investiga no alerta proprietáriu sira, ema indonéziu sira, maibé mós ema malaiu sira ka sidadaun sira hosi Singapura, katak bele hetan prosesu bainhira konsidera hanesan inséndiu kriminozu nian.

Inséndiu sira ne'ebé susar liu hodi hapara maka sira ne'ebé maka iha área maran sira hosi turfeira sira ne'ebé hetan sunu maka'as no emiti kuantidade hosi suar ne'ebé maka'as.

Iha sentru hosi illa Kalimantan, suar maka'as hosi inséndiu sira estraga maka'as tebes kualidade ar nian.

Índise hosi Kualidade Ar nian (AQI), ne'ebé sukat konsentrasaun hosi partíkula mihis sira PM2.5, aumenta ba 2.000 iha sidade Palangkaraya iha loron-domingu, haktuir hosi organizasaun Greenpeace. Nível ida ne'ebé ladún akontese no "perigozu" ba saúde.

Tanba falta vizibilidade nian, kompañia aéreu nasional Garuda kansela ona semo sanulu resin ba Kalimantan.

Nia konkorente, kompañia aéreu ho folin ki'ik Lion Air kansela ona semo hamutuk 160 resin ba Kalimantan durante findesemana ne'e.

Tanba suar tóxiku ne'ebé maka mosu hosi inséndiu sira, ema hamutuk 150.000 resin tenki hetan tratamentu tanba infesaun respiratóriu mak'as sira iha fulan hirak ikus ne'e, hatete hosi autoridade sira saúde Indonézia nian.

Maski inséndiu ai-laran sira akontese tinan-tinan iha Indonézia, tinan ne'e aumenta ona tanba estasaun maran ida ne'ebé maka naruk ho intensu tebes.

Ho hektar hamutuk 328.000 ne'ebé maka hetan sunu dezde inísiu tinan ne'e, inséndiu sira ne'e hanesan ida ne'ebé maka aat liu dezde inséndiu devastador sira iha tinan 2015.

Kalohan suar nian ne'ebé maka espalla hosi rejiaun boot ida kria mós tensaun diplomátiku sira ho nasaun viziñu sira, Malázia ho Singapura.

Ba dala uluk iha tinan tolu nia laran, iha loron-sábadu, nível poluisaun nian to'o ona nível aat tebes iha Singapura.

Lusa

 


Comentários

Critério de publicação de comentários