Pájina aktualizada iha 03:11h, kuarta-feira 21 Novembru

Justifikasaun Iraun nian kona-ba atake hasoru Arábia Saudita hanesan inaseitável

17 de Setembro de 2019, 23:02

Ministru Negósiu Estranjeiru hosi Emiradu Árabe Unidu konsidera ona iha loron-tersa ne'e katak hanesan inaseitável atu Prezidente Iraun nian justifika atake sira hasoru instalasaun petrolíferu sira Arábia Saudita nian hanesan defeza ida hosi Huthis tanba bombardeamentu saudita sira nian.


"Justifika atake terorista ida ne'ebé nunka akontese hasoru instalasaun sira Aramco nian ho dezenvolvimentu sira hosi funu iha Iémen hanesan inaseitável tebes", afirma hosi Anwar Gargash iha Twitter ofisial nasaun nian.

Anwar Gargash reaje ba deklarasaun sira hosi Prezidente Iraun nian, Hassan Rohano, ne'ebé halo iha Turkia, bainhira hasoru malu ho nia homólogu rusu, Vladimir Putin, no Prezidente turku, Recep Tayyip Erdogan.

Rohani konsidera ona iha loron-segunda katak atake sira Arábia Saudita, ne'ebé reklama hosi rebelde sira Huthis, hanesan de'it "defeza ida".

"Povu Iémen nian labele haree de'it bainhira nia nasaun hetan destruisaun. Defende nia nasaun no halo kontra-atake sira", hatete hosi líder iranianu, hodi refere ba asaun ne'ebé reklama hosi rebelde Huthis sira ne'ebé kombate Arábia Saudita iha funu Iémen nian.

Iha tweet hanesan, Gargash admiti ona katak "atake hasoru Arábia Saudita hanesan aumentu perigozu ida duni" no apela ona ba nasaun árabe sira no ba komunidade internasional hodi mantén "pozisaun loloos", hamutuk ho Arábia Saudita hodi iha "estabilidade ho seguransa iha rejiaun".

Arábia Saudita la akuza Iraun diretamente ba lansamentu atake iha loron-sábadu, hakarak hein ba rezultadu sira hosi investigasaun ida ne'ebé maka nia husu partisipasaun hosi espesialista internasional sira no hosi ONU.

Iha parte seluk, koligasaun ne'ebé lidera hosi Arábia Saudita hatete ona iha loron-segunda katak, ho baze iha rezultadu preliminar sira investigasaun nian, arma sira hosi atake hanesan "iranianu" no asaun sira ne'e la lansa hosi Iémen, hanesan hatete hosi Huthis.

Tuir imajen sira satélit nian ne'ebé fó sai hosi órgaun sira komunikasaun sosial norte-amerikanu nian, dispozitivu sira ne'ebé lansa ona atake karik lansa iha Noroeste, ne'ebé lokalizadu Iraun ho Irake, no la'ós Iémen, hosi Súl Arábia Saudita nian.

Prezidente Estadus Unidus nian, Donald Trump, akuza ona Iraun hanesan responsável ba atake, maski autoridade iranianu sira nega ona envolvimentu ruma.

Konflitu iha Iémen hahú iha final 2014 nian, bainhira rebelde sira okupa ona kapital Sanaa no provínsia sira seluk iha nasaun no duni sai Prezidente Abdo Rabu Mansur Hadi, ne'ebé agora daudaun hela iha Arábia Saudita.

Riade ho nia aliadu árabe sira halo intervensaun militar iha konflitu dezde Marsu 2015 hodi tenta halakon Huthis no rekupera líder exiladu, nune'e halo Iémen sai hanesan senáriu aat liu hosi krimi humanitáriu iha mundu, haktuir hosi ONU.

Rebelde sira Huthis ameasa ona iha loron-segunda atu lansa atake foun sira hasoru objetivu sira iha Arábia Saudita.

Asaun hasoru refinaria boot petrolíferu saudita rua Aramco, líder mundial, hamenus ona produsaun hosi petróleu ba baril millaun 5,6 resin loron-loron no halo folin petróleu nian aumenta.

Lusa

 


Comentários

Critério de publicação de comentários