Pájina aktualizada iha 21:55h, kuarta-feira 20 Novembru

Libertasaun Xanana Gusmão nian ho inserteza hosi nia regresu ba Timor-Leste iha 1999

19 de Setembro de 2019, 19:19

Dalan ida hodi konta 'filmi' hosi saída ba liberdade Xanana Gusmão nian hosi Indonézia, iha tinan 20 liubá, maka ho hahán: keiju hosi serra ho bakallau iha embaixada ida iha Jakarta ho manu-tunu iha tasi-ibun australianu ida.


Refeisaun rua ne'ebé hanesan surpreza fó kór ba momentu importante ida hosi períudu hafoin referendu iha loron 30 Agostu 1999 iha Timor-Leste, ne'ebé maioria hosi ema timoroan sira hili ona independénsia.

Istória hosi viajen ba liberdade ne'e konta ba Lusa hosi Paula Pinto, feto dahuluk hosi feto na'in tolu ne'ebé maka iha tinan 1999 monta ona gabinete apoiu nian hosi prezu ida ne'ebé koñesidu liu iha momentu ne'ebá iha Indonézia, Xanana Gusmão.

"Operasaun hanesan ona filmi kompletu ida. Asaun ne'e organiza ho apoiu hosi korpu diplomátiku balun ho ONU", Paula Pinto konta ba Lusa, iha Díli, hodi fó sai ba dala uluk detalle balun hosi istória.

"Xanana Gusmão hakarak fila kedas ba Timor-Leste maibé ONU ho korpu diplomátiku hanoin katak hanesan imprudente, ne'ebé sei bele mate. Ita ko'alia kona-ba loron 18 Setembru, loron ne'ebé maka ami sai hosi Jakarta", nia rekorda.

Xanana Gusmão nia libertasaun akontese, ofisialmente, iha loron 18 Setembru 1999, loron rua antes efetivu dahuluk sira hosi INTERFET, forsa internasional ne'ebé lidera hosi Austrália, tama iha Timor-Leste.

Violénsia sira ne'ebé maka akontese iha Timor-Leste hamosu destruisaun hosi parte barak hosi infraestrutura sira hosi teritóriu no Xanana Gusmão fila ba nasaun ida ho futuru ida ne'ebé la loos, hasoru emerjénsia hosi ema deslokadu hamutuk atus resin no edifísiu sira ne'ebé hetan sunu hela.

"Ami organiza operasaun ida atu Xanana sai ba Austrália. Iha Austrália sei halibur CNRT tomak iha exterior, konverjénsia ida hosi membru sira CNRT nian iha estranjeiru no hahú hosi ne'ebá maka organiza hodi fila ba Timor liutiha loron balun", nia esplika.

Sira hotu iha konsiénsia hosi potensial risku sira - gabinete apoiu ba Xanana Gusmão hetan atake no iha manifestasaun sira loron-loron iha Embaixada Britániku nia oin, fatin ne'ebé maka transfere Xanana bainhira nia sai hosi kadeia Salemba, iha loron 07 Setembru.

Tanba ne'e, "saída hosi Jakarta halo ho segredu maka'as".

Iha loron 18, Paula Pinto organiza "almosu boot ida" ne'ebé partisipa mós hosi embaixadora, iha momentu ne'ebá, Ana Gomes ho reprezentante ONU nian Tamrat Samuel.

"Ana fornese ona bakallau ho keiju serra nian. Laiha ema ida maka hatene katak nia atu sai. Iha tuku rua loraik ha'u husu atu sira haloot mala sira. Iha tuku haat loraik ami aranka ba aeroportu Jakarta nian", nia hanoin hikas hodi rekorda katak Muladi, iha momentu ne'ebá nu'udar ministru Justisa indonéziu, despede pesoalmente.

Xanana Gusmão halo viajen iha semo ida Qantas nian ba Sydney, hafoin hosi ne'ebá ba sidade Cairns, iha sentru Austrália nian no ikusmai ba Darwin, iha Teritóriu Norte, ne'ebé to'o iha loron 20 Setembru hamutuk ona ho INTERFET iha Timor-Leste.

"Lori ami ba aviaun no hatama ami iha aviaun ki'ik ida no hafoin ne'e lori ba península ki'ik ida hosi Cobourg", nia hatete hodi refere ba rejiaun ida ho kilómetru 350 resin hosi leste Darwin nian, zona ida ne'ebé pratikamente laiha ema ida, iha de'it uma balun.

"Fatin ida izoladu tebes ne'ebé laiha rede ba telemóvel, laiha televizaun ho rádiu. Ha'u pasa kalan tomak hodi tenta aranja televizaun tuan ida ne'ebé maka iha ne'ebá, karik hosi tinan 60 nian", nia hatete.

Hafoin tama iha kadeia durante tinan hitu resin, Xanana Gusmão pasa nia kalan dahuluk ho liberdade loloos nia iha fatin ida ne'ebé izoladu liu hosi rejiaun.

"Maibé ho liberdade hodi hela iha kabana ki'ik ida ne'ebé halo hosi ai iha tasi-ibun nia oin, hodi bele hariis tasi bainhira ita hakarak. No ami pasa oras divertidu balun. Iha Xanana, Kirsty [Sword, ne'ebé ikusmai kaben ho líder timoroan], ha'u ho seguransa na'in tolu Xanana nian", nia afirma.

"Iha loron tuirmai helikópteru australianu ida mai lori ema na'in rua hosi ONU. Afinal buat hotu senti pániku iha Darwin. Falesidu João Carrascalão até hanoin katak ema na'ok tiha Xanana Gusmão. Sira hatene katak sai ona hosi Jakarta maibé laiha rejistu katak liuhosi Sydney ka Cairns no laiha ema ida maka hatene kona-ba ami", nia rekorda.

Pániku mosu to'o iha misaun ONU rasik ne'ebé pratikamente sai tomak hosi Díli no situa iha Darwin.

"Ami hasoru malu ho Ian Martin no foti ona desizaun atu ha'u ba ho sira iha helikópteru hodi prepara nia fila ba Darwin iha loron 22 no prepara konferénsia imprensa. Hakarak konferénsia imprensa boot ida hodi hatudu katak nia livre no ko'alia kona-ba saida maka sei akontese ho Timor-Leste", nia hanoin hikas.

No hahú roller-coaster hodi fila ba Timor.

"Ha'u senti triste husik tasi-ibun furak. Hafoin fulan hitu nia laran ne'ebé hanesan bulak, hosi momentu sira deskontrolu nian, tuur iha tasi-ibun ida ne'ebé hanesan paradizíaku tebes, tunu manu iha liberdade, la senti ameasa sira, laiha ema ida ne'ebé tuir ita. Hanesan sensasaun ne'ebé di'ak tebes", nia rekorda.

Lusa

 


Comentários

Critério de publicação de comentários