Pájina aktualizada iha 03:13h, kuarta-feira 21 Novembru

Mosambike sei lidera misaun hosi observador sira CPLP nian ba prezidensial iha Guiné-Bissau

20 de Setembro de 2019, 00:04

Mosambike hanesan nasaun konvidadu hodi xefia misaun hosi observador sira hosi Komunidade Nasaun sira Lian Portugeza (CPLP) ba eleisaun prezidensial sira iha Guiné-Bissau, fó sai hosi embaixador mosambikanu iha Lisboa, Joaquim Bule, ba Lusa iha loron-kinta ne'e.


Iha deklarasaun sira ba Lusa bainhira sai hosi reuniaun hosi Komité Konsertasaun Permanente CPLP nian, ne'ebé halo iha loron-kinta ne'e iha sede hosi organizasaun nian iha Lisboa, Joaquim Bule hatete katak "husu ona ba Mosambike" hodi prezidi misaun.

Agora, "ne'e sei liuhosi prosesu ponderasaun ida iha nível sede nian no la'ós embaixada maka sei foti desizaun".

Maibé, nia asegura katak seidauk iha desizaun ruma ne'ebé foti ona ka laiha indikasaun hosi Governu Mosambike nian kona-ba ema ne'ebé maka hili hodi kaer lideransa ba misaun ne'e.

Nia refere ona katak desizaun "sei foti iha tempu útil, ba konstituisaun hosi misaun observasaun nian no ba organizasaun hosi serbisu tomak ne'ebé tenki halo iha Guiné-Bissau".

"Iha reuniaun ne'e ami simu informasaun ezaustivu kona-ba vizita ne'ebé halo ona hosi prezidénsia hosi Konsellu Ministru sira ho sekretariadu ezekutivu CPLP nian iha Guiné-Bissau", hatutan hosi diplomata.

Nia adianta katak, haree ba nível CPLP nian serbisu halo iha konsertasaun ho konsulta permanente sira entre Estadu-membru sira, "iha interese atu Mosambike bele halo parte iha misaun hosi observasaun eleitoral CPLP nian ba Guiné-Bissau iha kualidade hosi prezidente, klaru katak Mosambike sei hanoin no foti desizaun di'ak".

Misaun hosi observador sira sei komposta hosi elementu na'in 13, maski seidauk defini númeru loloos tanba sei hein resposta ba konviti, esplika hosi fonte hosi sekretariadu ezekutivu CPLP nian.

Xefe diplomasia Cabo Verde nian, Luís Filipe Tavares, nasaun ne'ebé agora kaer prezidénsia rotativu hosi Komunidade Nasaun sira Lian Portugeza nian (CPLP) hatete ona, iha loron 13 Setembru, durante vizita ba Guiné-Bissau, katak organizasaun sei haruka observador eleitoral sira hodi akompaña eleisaun prezidensial sira iha nasaun ne'e.

"Tanba konviti hosi Governu Guiné-Bissau nian, ami sei haruka delegasaun ida hosi observador eleitoral sira ba eleisaun prezidensial sira iha loron 24 Novembru", afirma hosi ministru Negósiu Estranjeiru Cabo Verde nian, nasaun ne'ebé kaer prezidénsia CPLP nian, hafoin hasoru malu ho Prezidente guiniense, José Mário Vaz, durante nia vizita foin lalais ne'e ba nasaun ne'e.

Iha fulan ne'e, Luís Filipe Tavares halo ona vizita durante loron rua ba Bissau hodi akompaña sekretáriu-ezekutivu CPLP nian, embaixador portugés Francisco Ribeiro Telles.

Iha deklarasaun sira ba jornalista sira iha Prezidénsia guiniense, ministru Cabo Verde salienta mós katak CPLP hakarak ajuda Guiné-Bissau iha prosesu eleitoral hodi nune'e eleisaun sira bele hala'o iha klima dame ho hakmatek.

"Guiné-Bissau simu ona foin lalais ne'e vizita ida hosi CEDEAO [Komunidade Ekonómiku hosi Estadu sira hosi Áfrika Osidental], sai hanesan objetu hosi diskusaun iha Konsellu Seguransa ONU nian foin lalais no komunidade internasional tomak hein atu eleisaun prezidensial sira bele hala'o ho dalan di'ak, iha klima ida dame ho estabilidade nian", nia afirma.

"Guiné-Bissau hanesan nasaun boot ida, iha povu boot ida, traballador, no Cabo Verde ho CPLP iha ne'e hodi transmiti solidariedade ho apoiu ne'e ba prosesu eleitoral no liuliu ba dame, hodi nune'e Guiné bele hala'o hikas dalan sira dezenvolvimentu nian", nia hatutan.

Hatán ba Lusa kona-ba karik CPLP hanoin reforsa nia prezensa iha Bissau ho abertura hosi misaun permanente ida, xefe diplomasia hatán ona katak hanesan kestaun ida ne'ebé sei hanoin hela.

Nasaun sira ne'ebé halo parte iha CPLP maka Angola, Brazil, Cabo Verde, Guiné-Bissau, Guiné Ekuatorial, Mosambike, Portugal, São Tomé & Prínsipe ho Timor-Leste.

Lusa

 


Comentários

Critério de publicação de comentários