Pájina aktualizada iha 21:55h, kuarta-feira 20 Novembru

Estadus Unidus Amérika aprezenta pedidu hodi sai observador asosiadu ba CPLP

20 de Setembro de 2019, 20:41

Estadus Unidus Amérika entrega ona iha loron-kuarta ne'e pedidu hodi nasaun sai hanesan observador asosiadu hosi Komunidade hosi Nasaun sira Lian Portugeza (CPLP) nian, revela hosi embaixador Cabo Verde nian iha Portugal ba Lusa.


"Loos duni, ami foin simu pedidu ida hosi Estadus Unidus [Amérika] iha sentidu hodi sai hanesan observador CPLP nian", afirma hosi embaixador Cabo Verde nian, nasaun ne'ebé kaer prezidénsia rotativu hosi organizasaun, iha Lisboa, Eurico Monteiro, ba Lusa.

Eurico Monteiro, ne'ebé ko'alia ba Lusa bainhira hakotu reuniaun iad hosi komité konsertasaun permanente CPLP nian, adianta ona katak Estadu-membru sira agora sei "analiza ho atensaun tebes no, iha sirkunstánsia sira sleuk ho kariñu tebes, tanba klaru bainhira nasaun ida halo pedidu ida hosi estatutu observador asosiadu (...) hanesan motivu satisfasaun ba CPLP, no liuliu iha kazu hosi nasaun ida hanesan Estadus Unidus".

Nia reforsu katak tanba saida maka EUA "reprezenta iha mundu, ba nia importánsia ho nia relevánsia, ami senti satisfeitu sira ho manifestasaun ida hanesan ne'e".

Diplomata kabu-verdianu iha Portugal konsidera mós katak nasaun ida ho "dimensaun EUA nian ajuda nafatin hodi fó vizibilidade ba CPLP, prestíjiu boot no sei sai nafatin hanesan parseiru ida" ne'ebé organizasaun bele konta, "ho seguru, iha inisiativu oioin no iha reforsu hosi koperasaun ho Estadu-membru sira", nune'e mós iha "mobilizasaun hosi enerjia sira".

"Ne'e hanesan seguramente momentu importante ida no asaun ida ho relevánsia boot ba CPLP", konklui Eurico Monteiro.

Maibé desizaun ikus kona-ba pedidu ne'e bele aprova de'it iha reuniaun hosi xefe Estadu sira ho Governu CPLP nian, iha Jullu tinan oinmai, iha angola, adianta hosi fonte CPLP nian.

Estatutu observador kria iha simeira daruak hosi organizasaun, iha sidade Praia, iha Jullu 1998, hodi hatán ba CPLP nia hakarak hodi aumenta kolaborasaun extra komunitáriu sira.

Iha tinan 2005, iha Konsellu Ministru sira CPLP nian ne'ebé halibur iha Luanda, estabelese ona kategoria sira hosi observador asosiadu no observador konsultivu.

Estadu sira ne'ebé hakarak hetan estatutu observador asosiadu tenki fahe prinsípiu orientador sira ne'e, liuliu kona-ba promosaun hosi prátika demokrátiku sira, governasaun di'ak no respeitu ba direitu ema sira nian, no prosege liuhosi sira nia programa governu nian objetivu sira ne'ebé hanesan ho CPLP nian, maski, iha inísiu , la halibur kondisaun nesesáriu sira hodi sai nu'udar membru loloos hosi organizasaun ne'e, haktuir hosi 'site' ofisial hosi komunidade ne'e.

Kona-ba kandidatura sira, tenki "iha fundamentasaun loloos hodi bele hatudu interese loloos ida ba prinsípiu sira ho objetivu sira CPLP nian", refere hosi organizasaun, no sei aprezenta ba sekretariadu ezekutivu ne'ebé, hafoin apresiasaun hosi komité konsertasaun permanente (kompostu hosi embaixador sira hosi Estadu-membru sia), sei haruka ba konsellu ministru sira nian, ne'ebé sei rekomenda desizaun ikus ba simeira hosi xefe Estadu sira ho Governu sira nian.

Observador asosiadu sira bele partisipa, lahó direitu ba votu, iha simeira sira no iha konsellu ministru sira nian, no fó ba sira asesu ba korespondente dokumentasaun la'ós konfidensial, bele nune'e aprezenta komunikasaun sira bainhira iha autorizasaun hodi halo. Aleinde ne'e, bele sai hanesan konvidadu ba reuniaun sira ho karáter tékniku.

Maibé, Estadu-membru ruma hosi CPLP bele, bainhira hanesan oportunu, husu atu reuniaun ne'e halo lahó partisipasaun hosi observador sira.

"Kualidade hosi observador asosiadu ka konsultivu bele hasai, temporáriu ka definitivu, bainhira verifika mudansa sira ba kondisaun sira ne'ebé rekomenda nia autorizasaun", nia hatutan. Iha kazu ne'e, desizaun ikus fó ba órgaun ne'ebé desidi ona admisaun, ho baze iha resposta hosi sekretariadu ezekutivu no hafoin apresiasaun hosi komité konsertasaun permanente nian.

Agora daudaun, CPLP iha nasaun observador asosiadu hamutuk 18 ho organizasaun ida maka OEI - Organizasaun hosi Estadu Ibero-Amerikanu sira nian.

Nasaun sira ne'ebé halo parte iha CPLP maka Angola, Brazil, Cabo Verde, Guiné-Bissau, Guiné Ekuatorial, Mosambike, Portugal, São Tomé & Prínsipe ho Timor-Leste.

Lusa

 


Comentários

Critério de publicação de comentários