Pájina aktualizada iha 21:55h, kuarta-feira 20 Novembru

Prezidente Repúblika subliña "susesu militar" hosi INTERFET iha Timor-Leste

20 de Setembro de 2019, 22:29

Prezidente Repúblika, Francisco Guterres Lu-Olo, subliña iha loron-sesta ne'e "susesu militar" ho "importánsia" hosi Forsa Internasional ba Timor-Leste (INTERFET) iha nasaun iha tinan 20 liubá, iha serimónia ida iha Parlamentu timoroan nian iha Díli.


"INTERFET hanesan susesu militar ida no konstitui modelu ida ba operasaun sira hosi manutensaun dame nian. Kumpri ona, felismente, misaun estabilizasaun nian. Mandatu ONU nian implementa ho di'ak ho respeitu ba regra sira ne'ebé iha akordu", afirma hosi xefe Estadu, iha diskursu ida ne'ebé hala'o ba personalidade importante timoroan sira nian, ba reprezentante sira hosi nasaun oioin no personalidade relevante sira iha istória hosi joven nasaun, hanesan komandante dahuluk hosi INTERFET nian, jeneral australianu Peter Cosgrove.

Lu-Olo rekorda katak INTERFET "benefisia ona hosi mandatu eskritu sira ne'ebé robustu tebes ho klaru, dezde Funu Golfo nian", tama iha Timor-Leste "ekipadu, armadu ho preparadu hodi atua iha ambiente ne'ebé la estável, ho risku aas no laiha serteza".

"Hanesan importante tebes atu INTERFET tama iha nasaun, tanba kria ona, lalais, klima seguransa ida no ambiente estável ida no seguru liu ba atuasaun hosi UNTAET (Administrasaun Tranzitóriu hosi ONU nian iha Timor-Leste) no ba ami nia marxa ba restaurasaun hosi ami nia independénsia, iha Maiu tinan 2002", xefe Estadu destaka.

Nasaun hamutuk 21 kontribui ona iha períudu oioin ne'ebé intensu ba INTERFET, Austrália ho Nova Zelándia hanesan nasaun sira ne'ebé ho kontribuinte maka'as. "Tanba ne'e, ami agradese ba Governu Austrália nian tanba kompromete lidera esforsu internasional hosi manutensaun dame nia hodi haree ba restaurasaun hosi orden iha ami nia nasaun", afirma hosi Lu-Olo.

Prezidente rekorda ona rezultadu hosi referendu kona-ba autodeterminasaun Timor nian iha loron 30 Agostu 1999 ho konsekuénsia aat sira hosi opsaun timoroan sira nian ba independénsia hosi Indonézia.

"Realizasaun hosi mehi ne'e iha ona folin todan ida. Anúnsiu hosi rezultadu Konsulta Popular hamosu klima ida tensaun nian ne'ebé ikusmai hamosu iha violénsia ho teror ne'ebé halo hosi milísia pró-indonéziu sira ho konivénsia hosi elementu sira hosi TNI", forsa armada indonéziu sira nian.

"Mundu asisti ona, ho xoke, ba destruisaun hosi infraestrutura sira nasaun nian. Uma sira hetan sunu iha munisípiu sira hotu no lalais tebes mosu klima teror no tauk nian iha teritóriu tomak. Polítika "sunu mutuk" rezulta iha destruisaun hosi 2/3 hosi teritóriu, inklui parte boot hosi ami nia patrimóniu kultural, ami nia memória institusional. Tuir relatóriu hosi Komisaun Amizede, Verdade ho Rekonsiliasaun, entre ema na'in 1.400 ho 1.500 maka ema oho ka lakon durante tinan 1999 nia laran no parte ida hosi populasaun besik ema timoroan 250.000 sai refujiadu iha kampu sira ne'ebé situa iha Timor Osidental", nia hatete.

INTERFET nia entrada iha Timor-Leste viabiliza ona instalasaun iha teritóriu hosi "organizasaun humanitáriu" barak, ne'ebé maka xefe Estadu halo ona homenajen, antes agradese mós ba media internasional sira ne'ebé "halo ona denúnsia kona-ba hahalok aat sira ne'ebé halo durante fulan Setembru ne'e (…)".

"Lahó sira, mundu sei laiha koñesimentu loloos kona-ba ami nia luta ba autodeterminasaun ho independénsia", nia hatete.

Durante tinan 20 ikus ne'e, "Timor-Leste harii nafatin fundasaun sira hosi Estadu foun ida, ho baze iha Konstituisaun modernu ida", Lu-Olo hatutan mós.

"Ami identifika ona ami nia dezafiu sira. Importa maka hetan dalan loloos sira hodi to'o ba modelu ida hosi dezenvolvimentu demokrátiku ho sustentável hosi ami nia sosiedade no ne'ebé bele hakotu ho kiak, iha aspetu tomak", nia hatutan.

Lusa

 


Comentários

Critério de publicação de comentários