Pájina aktualizada iha 03:07h, kuarta-feira 21 Novembru

Indonézia hatete katak falla sira iha modelu Boeing nian kontribui ba asidente hosi aviaun Lion Air

23 de Setembro de 2019, 19:50

Autoridade indonéziu sira aponta katak problema sira iha projetu ho supervizaun hosi Boeing 737 MAX nian iha papel importante ida iha asidente hosi aeronave Lion Air nian iha Indonézia iha tinan 2018.


Tuir konkluzaun preliminar sira hosi relatóriu ida hosi autoridade indonéziu sira, ne'ebé maka The Wall Street Journal iha asesu, asidente ne'e provoka mós hosi sala pilotajen sira ho problema sira manutensaun nian.

Iha Outubru 2018, aviaun ida hosi kompañia aéreu Lion Air monu liutiha minutu 12 hafoin deskolajen iha Indonézia, halo ema pasajeiru sira ho tripulante sira hamutuk na'in 189 mate.

Iha fulan-Marsu tinan ne'e, semo ida hosi Ethiopian Airlines monu liutiha minutu neen hafoin deskolajen, halo ema na'in 157 mate.

Investigador indonéziu sira sei bele muda relatóriu ne'ebé fahe ona ho Administrasaun Federal hosi Aviasaun EUA nian (FAA, iha sigla ingleza) no Diresaun Nasional hosi Seguransa iha Transporte, hatete hosi Wall Street Journal.

Autoridade norte-amerikanu sira sei vizita Indonézia iha fulan ne'e nia rohan hodi ko'alia kona-ba asuntu.

Iha loron 03 Juñu, Boeing informa ona autoridade sira hosi aviasaun EUA nian katak modelu hamutuk 300 resin hosi aeronave sira 737 NG ho 737 MAX iha pesa sira "ne'ebé fabrikadu ho dalan laloos", indika hosi FAA.

Parte ida ne'ebé afetadu liu maka mekanizmu hosi aviaun nia liras ne'ebé modifika karakterístika sira hosi subida no rezisténsia durante deskolajen sira ho aterajen sira, refere hosi FAA iha komunikadu.

Tuir FAA, nia investigasaun determina ona katak iha Boeing NG hamutuk 32 no Boeing Max hamutuk 33 maka afetadu iha Estadus Unidus. Hamutuk aviaun sira "133 NG ho 179 MAX" maka afetadu iha mundu tomak, hatutan hosi FAA.

Boeing 737 hetan bandu hodi semu iha kuaze nasaun tomak iha mundu.

Lusa

 


Comentários

Critério de publicação de comentários