Pájina aktualizada iha 22:36h, domingu 17 Novembru

Balansu foun: Pelumenus ema na'in 26 mate ho na'in 70 kanek iha konflitu sira iha Indonézia

24 de Setembro de 2019, 19:34

Pelumenus ema na'in 26 mate ona no na'in 70 hetan kanek iha konflitu foun sira ne'ebé mosu iha loron-segunda iha Papua, provínsia Indonézia nian, ne'ebé hetan violénsia hahú iha fulan-Agostu nia klaran, indika hosi autoridade sira iha balansu foun iha loron-tersa ne'e.


Balansu antes hatudu ba ema na'in 20 mate no na'in 65 kanek.

Iha loron-segunda, multidaun ida ne'ebé hirus sunu ona prédiu sira, loja sira ho uma sira hosi governu lokal ho sunu mós karreta sira ho motor sira iha sidade Wamena, iha provínsia Papua, iha protestu ida ne'ebé halibur ema atus resin ne'ebé mosu tanba deskonfia insultu xenófobu sira hosi profesór ida ba estudante indíjena na'in ida.

Porta-vós hosi polísia iha Papua, Ahmad Musthofa Kamal, hatete katak hetan tan mate-isin neen iha besik edifísiu sira ne'ebé hetan sunu nia rahun.

Iha manifestasaun seluk ida, iha Jayapura, kapital provínsia nian, ne'ebé halo soldadu na'in ida ho ema sivil na'in tolu mate, polísia kaer ona estudante unviersitáriu na'in 733 hodi halo interogatóriu, indika hosi porta-vós Polísia Nasional, Dedi Prasetyo.

Estudante sira halibur hamutuk iha Universidade Jayapura nia oin hodi halo protestu kontra rasizmu.

Maibé, akontese konfrontu sira ho polísia ne'ebé halo tiru sira avizu nian hodi fahe sira ba fatin seluk, haktuir hosi jornalista ida hosi ajénsia notísia France-Presse (AFP).

Iha Wamena, sede hosi departamentu governu lokal nian hetan estraga tanba inséndiu ida, nune'e mós akontese ho edifísiu sira seluk ho loja sira.

Hahú hosi loron 19 Agostu, fatin barak iha Papua hasoru manifestasaun sira, balun hamosu konflitu sira ho edifísiu sira hetan sunu no konfrontu sira ho polísia.

Ajitasaun maka'as liu hahú iha reasaun ba insidente rasista sira hasoru estudante sira hosi Papua iha Surabaya, sidade boot daruak iha Indonézia iha illa Java, iha mós pedidu sira ba referendu ida kona-ba independénsia.

Lusa

 


Comentários

Critério de publicação de comentários