Pájina aktualizada iha 22:36h, domingu 17 Novembru

Unicef: Inséndiu sira iha Indonézia hamosu risku ba labarik millaun sanulu

24 de Setembro de 2019, 22:30

Ai-han ai-laran sira ne'ebé maka akontese dezde fulan-Juñu iha Indonézia hamosu daudaun risku ba saúde ba labarik sira hamutuk millaun 10 resin tanba kalohan hosi suar tóxiku sira ne'ebé mosu, alerta hosi Unicef iha loron-segunda ne'e.


Joven kuaze millaun 10 ho ne'ebé seidauk to'o tinan 18, 1/4 balun seidauk to'o tinan lima, hela iha área sira ne'ebé afetadu liu iha illa Sumatra no iha parte indonéziu hosi Bórneu, aviza hosi Fundu ONU nian ba Infánsia (Unicef), iha deklarasaun ida ne'ebé fó sai iha loron-tersa ne'e.

Labarik ki'ik sira hanesan sira ne'ebé maka fraku liu, tanba dezenvolve hela sira nia sistema imunolójiku, alerta hosi Unicef, hodi hatutan katak iha risku aas ida hosi kosok-oan sira ne'ebé maka moris hosi inan sira ne'ebé maka hasoru poluisaun durante isin-rua tanba bele moris ho todan ki'ik liu hosi pezu médiu ka bele moris antes nia tempu.

Indonézia hasoru hela inséndiu ai-laran rihun resin, ne'ebé hahú iha fulan-Juñu no sai aat ba nafatin to'o iha inísiu fulan ne'e, halo taka eskola sira ho aeroportu sira, tanba suar maka'as ne'ebé maka halo hosi ahi ne'ebé han iha kilómetru atus resin.

Inséndiu sira, ne'ebé akontese liuliu iha Sumatra ho illa sira Bornéu nian, halo poluisaun ba ár hosi área boot ida hosi sudeste Ázia nian, hamosu ona konflitu diplomátika ho Malázia, nasaun viziñu ne'ebé kesar suar poluente sira ne'ebé atravesa ona fronteira no ne'ebé afeta ema millaun resin.

Kuaze bombeiru ho soldadu hamutuk rihun 30 maka kombate ahi sira ne'ebé akontese barak tanba ema maka halo.

Tinan-tinan, akontese inséndiu sira iha arkipélagu indonéziu maibé númeru aumenta ona iha tinan ne'e hafoin estasaun maran ne'ebé maka naruk no maka'as tebes.

Hahú hosi loron-domingu maka rejiaun balun iha nasaun aprezenta kalohan mean ne'ebé akontese tanba abuabu ho poluisaun atmosférika sira hosi inséndiu florestal sira.

"Kualidade ár ne'ebé ladi'ak hamosu perigu sériu ida iha Indonézia no sai aat ba nafatin", hatete hosi reprezentante hosi Unicef Debora Comini.

Serbisu hosi Monitorizasaun hosi Atmosfera Copernicus (CAMS), programa europeu ida ne'ebé uza informasaun hosi satelit, indika katak inséndiu sira iha Indonézia provoka ona libertasaun ida hosi kuaze CO2 hanesan iha atmosfera hanesan inséndiu sira iha tinan 2015 ne'ebé konsidera hanesan ida ne'ebé aat liu iha nasaun.

Entre inísiu fulan-Agostu no to'o loronm 18 Setembru, emiti ona gás efeitu estufa hamutuk tonelada millaun 360 kontra millaun 400 iha tinan 2015, observa hosi serbisu ne'e.

Polísia indonézia kaer ona ema na'in 180 resin no reprezentante sira hosi empreza haat ne'ebé deskonfia provoka inséndiu sira no taka ona plantasaun sanulu resin ne'ebé maka afetadu hodi investiga ho alerta proprietáriu sira.

Lusa

 


Comentários

Critério de publicação de comentários