Pájina aktualizada iha 03:11h, kuarta-feira 21 Novembru

Prezidente Repúblika kondekora padre portugés ho títulu póstumo

25 de Setembro de 2019, 23:15

Prezidente Repúblika, Francisco Guterres Lu-Olo, desidi iha loron-tersa ne'e kondekora padre portugés João de Deus Pires, ne'ebé mate iha loron-domingu liubá, ho medalla Orden Timor-Leste nian, ho títulu póstumo.


Iha dekretu prezidensial ida ne'ebé maka Lusa iha asesu, Francisco Guterres Lu-Olo destaka "intervensaun extraordináriu" hosi João de Deus Pires, misionáriu salezianu, iha asisténsia ba populasaun iha tinan 1979 ho 1980 no durante okupasaun indonéziu nian.

"Padre João de Deus Pires kontribui maka'as mós ba fundasaun hosi eskola oioin, liuliu, iha área sira ne'ebé maka iha misaun hosi Padre Salezianu sira nian, iha ponta leste nasaun nian", refere hosi nota ne'ebé destaka konsekuénsia hosi serbisu saserdote nian.

"Ohin loron, rekursu ema sira nian ne'ebé mai hosi eskola sira ne'ebé maka saserdote falesidu funda ona halo parte iha área oioin atividade sira nian hosi área públiku sira ho privadu sira", hatete hosi xefe Estadu.

Ba Prezidente Repúblika, "hanesan importante atu Estadu fó sai ba públiku rekoñesimentu ba sentidu humanista aas ne'e no ba dedikasaun extraordináriu, korajen ho determinasaun ne'ebé maka hatudu hosi João de Deus Pires".

Iha dokumentu, Prezidente delega investidura hosi kondekorasaun ba ministra Edukasaun, Juventude ho Desportu, Dulce de Jesus Soares.

Iha mensajen kondolénsia nian, Francisco Guterres Lu-Olo hatudu "triste maka'as" ho João de Deus Pires nia mate.

"Iha nia dalan hamutuk ho povu timoroan, padre João de Deus Pires sai ona nu'udar apoiante inkondisional ho determinante hosi luta ba libertasaun nasional. Hetan kaer ho hetan tortura hosi forsa invazor sira hamutuk ho nia maun-alin timoroan sira. Lori arma sira ba guerilla. Ajuda haruka ho dalan klandestinu rádiu ida ba guerilla sira iha ai-laran, hodi fasilita komunikasaun ho parte exterior", haktuir hosi Prezidente Repúblika.

Padre João de Deus Pires, misionáriu salezianu iha Timor-Leste, mate ona iha loron-domingu ne'e iha Díli, ho tinan 91.

João de Deus Pires moris iha Morais, Macedo de Cavaleiros, ordenadu saserdote iha tinan 1956, no iha tinan tuirmai haruka nia ba Timor-Leste.

"Hahú hosi tinan ne'ebá to'o ohin loron nia mantén nafatin iha Timor, dezenvolve atividade edukativu ho misionáriu oioin no maka'as, ultrapasa susar oioin no suporta kontraridade boot sira durante períudu okupasaun indonéziu nian", haktuir hosi Provínsia Portugeza hosi Sosiedade Salezianu nian iha nota ida ne'ebé haktuir hosi ajénsia Ecclesia iha loron-segunda ne'e.

"Tanba nia dedikasaun maka'as, hetan ona respeitu, admirasaun no mós venerasaun hosi povu timoroan, kontribui ho dalan notável ba nia evanjelizasaun no ba konsolidasaun hosi prezensa salezianu nian iha rai sira ne'e", hatutan hosi komunikadu.

Saserdote, antigu diretor hosi Orfanatu Santa Terezinha, iha Kelikai, hetan distinsaun hosi Prezidente portugés Jorge Sampaio ho grau hosi Komendador hosi Orden Méritu iha tinan 2004.

Iha teritóriu timoroan, simu ona Medalla hosi Ordem Dom Martinho Lopes tanba apoiu ne'ebé fó ba rezisténsia timoroan ho kontributu hanesan ba luta ba independénsia nian.

Lusa

 


Comentários

Critério de publicação de comentários