Pájina aktualizada iha 03:11h, kuarta-feira 21 Novembru

Governu hato'o votu pezar ba padre João de Deus Pires nia mate

26 de Setembro de 2019, 19:50

Iha loron-kuarta ne'e, Governu timoroan hato'o ona votu pezar ida ba padre João de Deus Pires nia falesimentu, ne'ebé akontese iha loron-domingu, mate ho tinan 91, iha Díli, kapital hosi nasaun ne'ebé maka nia hela dezde tinan 1957.


Iha nota, Governu destaka "atividade edukativu ho misionáriu ne'ebé intensu ho variadu" hosi saserdote portugés nian, hodi asinala nia knaat "durante okupasaun indonéziu".

"Nia knaar marka iha Timor-Leste nia istória, durante okupasaun indonéziu, iha momentu bainhira diminui baze sira apoiu nian, padre João de Deus haruka ona nia esforsu tomak iha asisténsia ne'ebé fó ba populasaun, hetan kaer no rende, ba asaun ne'ebé maka nia hasoru, iha tinan 1979 ho 1980, situasaun susar sira hosi hamlaha ho moras sira nian", hatete hosi dokumentu ne'ebé maka Lusa hetan asesu.

Ezekutivu aponta mós João de Deus Pires nia serbisu iha tinan hirak ikus ne'e hodi destaka nia servisu iha apoiu sosial ho edukasaun.

Iha loron-tersa, Prezidente Repúblika, Francisco Guterres Lu-Olo, desidi kondekora ona, ba títulu póstumu, saserdote portugés ho medalla Orden Timor-Leste nian.

Ba Prezidente Repúblika, "hanesan importante atu Estadu fó sai ba públiku rekoñesimentu ba sentidu humanista aas ne'e no ba dedikasaun extraordináriu, korajen ho determinasaun ne'ebé maka hatudu hosi João de Deus Pires".

Iha mensajen kondolénsia nian, Francisco Guterres Lu-Olo hatudu "triste maka'as" ho João de Deus Pires nia mate.

"Iha nia dalan hamutuk ho povu timoroan, padre João de Deus Pires sai ona nu'udar apoiante inkondisional ho determinante hosi luta ba libertasaun nasional. Hetan kaer ho hetan tortura hosi forsa invazor sira hamutuk ho nia maun-alin timoroan sira. Lori arma sira ba guerilla. Ajuda haruka ho dalan klandestinu rádiu ida ba guerilla sira iha ai-laran, hodi fasilita komunikasaun ho parte exterior", haktuir hosi Prezidente Lu-Olo.

Padre João de Deus Pires, misionáriu salezianu iha Timor-Leste, mate ona iha loron-domingu ne'e iha Díli, ho tinan 91.

João de Deus Pires moris iha Morais, Macedo de Cavaleiros, ordenadu saserdote iha tinan 1956, no iha tinan tuirmai haruka nia ba Timor-Leste.

"Hahú hosi tinan ne'ebá to'o ohin loron nia mantén nafatin iha Timor, dezenvolve atividade edukativu ho misionáriu oioin no maka'as, ultrapasa susar oioin no suporta kontraridade boot sira durante períudu okupasaun indonéziu nian", haktuir hosi Provínsia Portugeza hosi Sosiedade Salezianu nian iha nota ida ne'ebé haktuir hosi ajénsia Ecclesia iha loron-segunda ne'e.

"Tanba nia dedikasaun maka'as, hetan ona respeitu, admirasaun no mós venerasaun hosi povu timoroan, kontribui ho dalan notável ba nia evanjelizasaun no ba konsolidasaun hosi prezensa salezianu nian iha rai sira ne'e", hatutan hosi komunikadu.

Saserdote, antigu diretor hosi Orfanatu Santa Terezinha, iha Kelikai, hetan distinsaun hosi Prezidente portugés Jorge Sampaio ho grau hosi Komendador hosi Orden Méritu iha tinan 2004.

Iha teritóriu timoroan, simu ona Medalla hosi Ordem Dom Martinho Lopes tanba apoiu ne'ebé fó ba rezisténsia timoroan ho kontributu hanesan ba luta ba independénsia nian.

Lusa

 


Comentários

Critério de publicação de comentários