Pájina aktualizada iha 22:38h, domingu 17 Novembru

Balansu foun: Númeru hosi vítima mortal aumenta ba na'in 20 iha rai-nakdoko iha Indonézia

26 de Setembro de 2019, 21:36

Pelumenus ema na'in 20 mate hafoin rai-nakdoko ho magnitude 6,5 akontese iha loron-kinta ne'e iha arkipélagu Maluku, iha leste Indonézia nian, haktuir hosi ajénsia hosi jestaun ba dezastre sira.


"Númeru total hosi ema sira ne'ebé mate maka na'in 20", hatete hosi agus Wibowo, porta-vós hosi ajénsia, liuhosi komunikadu, hodi hatutan katak "pelumenus ema na'in 100 kanek no hasai ona ema na'in 2.000".

Rai-nakdoko estraga ona edifísiu oioin, inklui universidade ida, no hamosu rai-monu, informa hosi Ajénsia ba Jestaun Dezastre lokal.

Balansu anterior hosi autoridade sira hatudu katak ema na'in tolu mate no na'in ida seluk lakon.

Rai-nakdoko ho magnitude 6,5, haktuir hosi Institutu Jeofíziku Estadus Unidus nian (USGS), akontese iha tuku 08:46 oras lokal ho nia episentru detekta iha kilómetru 37 hosi nordeste Ambon nian, iha provínsia Maluku.

Hafoin ne'e iha nakdoko sira seluk, hamosu pániku entre populasaun sira ne'ebé halai ba fatin sira ne'ebé aas.

"Impaktu ne'e senti iha Ambon ho fatin sira ne'ebé besik", hatete hosi Rahmat Triyono, funsionáriu hosi Ajénsia Meteorolójika, Klimátika ho Jeofízika (BMKG).

"Iha kamiaun ida liuhosi uma nia sorin, kandeiru sira hahú nakdoko", hatete hosi funsionáriu hanesan.

Imajen sira ne'ebé maka hetan iha Ambon, sidade ida ho populasaun hamutuk 400.000 resin, hatudu parte balun hosi muru sira ne'ebé monu, prédiu sira ne'ebé nakfera.

Responsável lokal hosi ajénsia ba jestaun hosi dezastre sira indonéziu nian, Oral Sem Wilar, husu ona ba populasaun hodi hakmatek.

"Ema sira hahú senti pániku no hahú husik fatin balun maibé ami hatete ona katak laiha motivu hodi senti pániku tanba laiha alerta tsunami", Wilar hatete ona ba ajénsia notísia AFP.

Indonézia, arkipélagu ida ho illa sira ho illa ki'ik sira hamutuk 17.000 ne'ebé forma hosi konverjénsia hosi plaka tektónika boot tolu (indo-Pasífiku, australianu ho eurazianu), lokaliza iha Ring of Fire hosi Pasífiku, área ida ho atividade sísmiku aas.

Arkipélagu iha vulkaun ativu hamutuk 100 resin.

Iha tinan liubá, iha fulan-Setembru nia rohan, rai-nakdoko ida ho magnitude 7,5 tuir tsunami ida iha illa Sulawesi estraga ona rejiaun Palu ho halo ema na'in 4.300 resin maka mate ho lakon.

Iha tinan 2004, tsunami ida halo ona ema na'in 220.000 resin mate iha rejiaun Oseanu Índiku, inklui na'in 170.000 iha Indonézia, hafoin kedas Natal, no mosu tanba rai-nakdoko ida ho magnitude 9,1 iha tasi-ibun Sumatra nian.

Lusa


Comentários

Critério de publicação de comentários