Pájina aktualizada iha 22:38h, domingu 17 Novembru

Mate ona antigu Prezidente fransés Jacques Chirac ho tinan 86

26 de Setembro de 2019, 22:16

Antigu Prezidente Fransa nian Jacques Chirac mate ona iha loron-kinta ne'e, ho tinan 86, anunsia hosi nia mane-foun, Frédéric Salat-Baroux.


"Prezidente Jacques Chirac mate ona ohin dadeer ho hakmatek no akompaña hosi nia família", hatete hosi Salat-Baroux, Chirac nia oan-feto ki'ik liu Claude nia laen.

Xefe Estadu Fransa nian entre tinan 1995 no 2007, Jacques Chirac iha ona kareira polítika ida ne'ebé naruk liu iha Europa, bainhira kompleta tinan 40 iha pozisaun polítika oioin, inklui knaar sira nu'udar Prezidente Repúblika, primeiru-ministru, visi-ministru, prezidente kámara Paris nian ho líder hosi partidu.

Antigu Prezidente Fransa nian, ne'ebé durante tinan barak nia laran la mosu iha públiku, lakon ona memória, karik akontese tanba forma ida hosi moras Alzheimer ka derame ida ne'ebé nia hetan durante períudu Prezidénsia nian.

Nia mandatu sira nu'udar Prezidente marka ho "la'e" kontra funu daruak hosi Irake, ne'ebé hahú hosi Estadus Unidus iha tinan 2003, ba final hosi rekrutamentu militar, ba rekoñesimentu hosi responsabilidade hosi Estadu fransés ba krimi nazi sira nian iha funu mundial daruak no ba nia pozisaun no bolu atensaun kona-ba degradasaun hosi ambiente.

Chirac sai mós nu'udar Prezidente fransés dahuluk ne'ebé maka hetan kondenasaun hosi Justisa.

Iha tinan 2011, Jacques Chirac hetan kondenasaun ba tinan rua ho kastigu suspensaun hosi kadeia tanba jazu ida hosi serbisu bosok ida bainhira nia kaer kargu nu'udar prezidente kámara Paris nian.

Jacques Chirac konsege konkista ona Prezidénsia franseza iha tinan 1995 hafoin kandidatura rua ne'ebé laiha susesu (iha tinan 1981 ho 1988).

Asembleia Nasional ho Senadu fransés halo ona minutu silénsia ida bainhira rona notísia hosi antigu Prezidente nia mate, figura importante hosi direita iha nasaun.

Lusa

 


Comentários

Critério de publicação de comentários