Pájina aktualizada iha 21:53h, kuarta-feira 20 Novembru

Jornalista sira kanek iha protestu sira Hong Kong nian, emisora públika hasai repórter sira iha teritóriu

02 de Outubro de 2019, 00:28

Pelumenus jornalista na'in haat kanek iha loron rua ikus ne'e hosi protestu sira iha Hong Kong, senáriu ida ne'ebé halo emisora públiku RTHK hasai repórter sira hotu ne'ebé maka halo hela kobertura iha fatin sira.


Desizaun hosi Rádiu Televizaun Hong Kong nian foti hafoin nia jornalista na'in ida kanek iha matan ida iha konfrontu ida entre manifestante sira ho polísia iha Sham Shui Po. Maibé, orden ba jornalista sira hodi fila ba redasaun hanoin hikas fali iha kazu seluk ne'ebé maka jornalista na'in rua hosi televizaun ida sai hanesan vítima hosi líkidu kanserozu ida iha sira nia liman ho oin.

Informasaun dahuluk mosu liuhosi polísia, ne'ebé akuza ona manifestante sira hodi uza líkidu perigozu sira ne'ebé sunu ajente sira ho jornalista sira nia kulit, ho forsa seguransa sira aprezenta imajen oioin hosi ajente sira nia isin, ne'ebé bele haree keimadura sira hosi kulit no uniforme sira ne'ebé maka kona líkidu ne'e.

Epizódiu seluk, iha sábadu, envolve ona jornalista indonézia ida ne'ebé, hanesan mós jornalista RTHK, iha loron-tersa ne'e, kona iha nia matan ida.

Iha loron antes protestu iha loron-tersa ne'e, Asosiasaun hosi Jornalista sira Hong Kong nian lamenta ona "uzu ho ameasa hosi violénsia nian hasoru jornalista sira ne'ebé halo reportajen" iha teritóriu.

Aleinde jornalista sira, elementu oioin hosi polísia hetan mós kanek, ho kazu sira ne'ebé koñesidu liu to'o agora iha ligasaun ba atake sira hosi líkidu perigozu ne'e.

Epizódiu todan liu maka hosi joven estudante ida, tinan 18, ne'ebé maka hetan tiru hosi frosa seguransa sira iha hirus-matan no agora hetan hela tratamentu iha ospital ida.

Forsa seguransa sira, iha vídeo ne'ebé publika iha Facebook lamenta ona insidente, maibé esplika katak disparu sira halo hosi polísia ida ne'ebé tauk lakon nia moris no hosi nia kolega sira iha momentu ida ne'ebé maka sira hetan atake.

"Forsa polísia sira lakohi haree ema ida kanek, nune'e ami senti triste tebes ho akontesimentu ne'e. Ami alerta ona manifestante sira hodi hapara lalais violasaun lei ne'e, tanba sei iha aplikasaun ne'ebé maka'as tebes", hatete hosi responsável ida hosi polisia.

Protestu boot akontese iha illa Hong Kong no halibur pelumenus manifestante millaun resin, maibé epizódiu sira violénsia nian akontese iha parte norte teritóriu nian, ho de'it liña metro ida maka funsiona, suspensaun hosi autokarru sira no blokeiu hosi estrada sira ne'ebé halo hosi autoridade sira nune'e sira laiha posibilidade hodi partisipa iha manifestasaun boot ne'ebé maka hetan ona bandu hosi polísia.

Iha loron ne'ebé selebra tinan 70 hosi fundasaun Repúblika Popular Xina nian, sentru hosi illa Hong Kong hetan vijilánsia polísia durante loraik tomak ho helikópteru ida, ne'ebé tuir protestu boot, ho polísia iha pozisaun durante trajetu tomak iha estasaun sira ne'ebé taka ka iha pasajen aéreu estratéjiku sira.

Maski iha bandu hosi polísia hodi halo manifestasaun iha loron nasional Xina nian, apelu sira atu populasaun Hong Kong nian sai fali ba estrada hodi eziji reforma demokrátiku sira iha teritóriu aumenta maka'as.

Governu Hong Kong nian hasai ona formalmente proposta polémika hosi emenda sira ba lei extradisaun nian, ne'ebé hanesan baze hosi protestu sosial dezde inísiu Juñu nian.

Maibé, manifestante sira eziji nafatin atu Governu hatán ba reklamasaun haat seluk: libertasaun hosi manifestante sira ne'ebé hetan kaer, atu asaun sira protestu nian labele identifika hanesan motin, inkéritu independente ida ba violénsia polisial no, ikusmai, demisaun hosi xefe Governu no hodi halo eleisaun liuhosi votasaun universal ba kargu ne'e no ba Konsellu Lejislativu, parlamentu Hong Kong nian.

Transferénsia hosi soberania Hong Kong nian ba Repúblika Popular Xina, iha tinan 1997, halo ho prinsípiu "nasaun ida, sistema rua".

Hanesan akontese ho Makau, rejiaun administrativu espesial xineza ne'e iha akordu ba períudu ida tinan 50 ho nível aas autonomia nian, nível ezekutivu, lejislativu ho judisial, ho Governu sentral xinés sai hanesan responsável ba relasaun externa sira ho defeza.

Lusa

 


Comentários

Critério de publicação de comentários