Pájina aktualizada iha 03:11h, kuarta-feira 21 Novembru

Austrália disponível hodi ajuda EUA iha investigasaun tanba deskonfia interferénsia rusu

03 de Outubro de 2019, 00:02

Governu australianu hatete iha loron-kuarta ne'e katak iha disponibilidade hodi kopera iha investigasaun ne'ebé deskonfia interferénsia rusu iha eleisaun prezidensial sira iha Estadus Unidus, tanba pedidu ida hosi Prezidente Donald Trump.


"Bainhira ami bele ajuda ho di'ak, ami sei ajuda, no ha'u hanoin katak Austrália labele komenta tan kona-ba investigasaun ida ne'ebé hala'o ho dalan adekuadu", hatete hosi xefe diplomasia australianu ba emisora lokal ABC.

Marise Payne nega ona katak Austrália "envolve mós" ba kestaun polítika internu ida hosi EUA nian no salienta: "iha sirkunstánsia sira ne'e ami serbisu iha interese hosi Austrália nian no ho ami nia aliadu ne'ebé besik liu no importante".

Maibé, governante la fornese pormenor sira kona-ba modelu koperasaun ka dokumentasaun ne'ebé envolvidu.

Gabinete primeiru-ministru australianu nian konfirma ona iha loron-tersa katak Trump husu ona, liuhosi telefone, ajuda ba Scott Morrison hodi kolabora iha investigasaun.

Iha loron-segunda, jornal New York Times fó sai iha notísia katak Trump husu ona ba Morrison atu bele ajuda prokurador-jeral EUA nian, William Barr, hodi hetan informasaun sira ne'ebé desvaloriza investigasaun hosi interferénsia rusu iha eleisaun prezidensial sira norte-amerikanu nian.

Iha tinan ne'e, Barr hahú ona revizaun ida hosi investigasaun ne'ebé deskonfia interferénsia rusu iha eleisaun prezidensial sira tinan 2016 nian, ne'ebé maka eleitu ona Donald Trump, hodi tenta determina karik forsa seguransa sira ka unidade sira intelijénsia nian halo asaun ne'ebé la adekuadu bainhira hahú hala'o investigasaun sira ne'e.

Lusa

 


Comentários

Critério de publicação de comentários