Pájina aktualizada iha 23:04h, domingu 20 Outubru

Governu estuda medida sira hafoin inséndiu ne'ebé estraga hektar 1.500 no uma hamutuk 487

07 de Outubro de 2019, 19:37

Governu estuda hela medida sira urjénsia nian hafoin inséndiu boot ne'ebé maka estraga ona uma atus resin no ai-laran liu hektar 1.500 iha súl Díli nian, parte boot ho produsaun kafé nian.


Foto fó hosi Cris Carrascalão ba SAPO Timor-Leste

"Área total ne'ebé afetadu maka liu hektar 1.500, ne'ebé 90% hanesan plantasaun kafé nian", hatete hosi Demétrio Amaral, sekretáriu Estadu ba Ambiente, ho baze iha informasaun ne'ebé atualiza iha loron-segunda ne'e, ba Lusa.

Inséndiu, ne'ebé iha zona balun sei akontese iha findesemana ne'e, hahú, tuir indikasaun, hosi sunu deskontroladu ida ne'ebé, tanba rai-maran ne'ebé maka akontese iha zona no tanba anin-boot, alastra ona ba suku oioin hosi munisípiu Ermera ho Liquiçá.

"Ami nia kálkulu sira, ho baze iha esperiénsia hosi rekuperasaun ambiental, no kálkulu ho valor ida dolar lima tuir metru kuadradu, sujere katak impaktu ekonómiku hosi inséndiu, ho baze hosi sasán sira ne'ebé lakon, maka hamutuk kuaze dolar millaun sia", nia esplika.

"Informasaun sira ne'ebé ami iha hatudu katak afeta ona família hamutuk 294, ho uma sira ne'ebé hetan estraga. Estraga mós Uma Lulik oioin iha rejiaun", nia esplika.

Governante refere ona katak autoridade polísia sira investiga hela indísiu sira ne'ebé hatete katak inséndiu hahú ho sunu ida no buka hatene katak iha inséndiu kriminal sira.

"Laiha ema ida maka haree ona inséndiu ida ne'ebé boot tebes. Estraga ona buat barak", nia esplika.

Cristina Carrascalão, ne'ebé sai sasin ba fúria hosi inséndiu - ne'ebé ameasa zona Fazenda Algarve, ne'ebé pertense ba nia família, rekorda ona drama ne'ebé maka populasaun sira hasoru iha zona, lahó dalan sira hodi kombate inséndiu.


Foto fó hosi Cris Carrascalão ba SAPO Timor-Leste

"Informasaun foun sira hatete katak uma hamutuk 487 maka hetan estraga. Tanba anin-boot ho ahi maka'as. Ami la konsege halo buat ida hodi hapara ahi sira", nia hatete hodi esplika katak akompaña ona bombeiru sira ne'ebé maka to'o iha zona afetadu liu.

"Laiha dalan sira, hanesan zona sira hosi foho nian ho asesu ne'ebé susar tebes no bele kombate de'it inséndiu sira ho aviaun sira ho helikópteru sira", nia hatete hodi refere katak inséndiu sira hanesan ne'e akontese iha tinan hirak ikus ne'e maibé la'ós ho kuantidade ida hanesan ne'e.

Sunu ne'ebé hanesan liu hosi kontrolu, anin no rai-maran, kontribui ona ba problema ne'ebé agora presiza iha medida lalais apoiu nian ba populasaun sira ne'ebé afetadu.

Impaktu hanesan maka'as tebes ba produtor sira kafé nian iha zona ne'ebé agora bele demora tinan barak nia laran - bainhira konsege kuda fali - to'o hetan rendimentu hosi produsaun.

Demétrio Amaral hatete ona katak inséndiu hatudu ona nesesidade hodi "envolve instituisaun oioin hodi asegura kondisaun di'ak sira ba kombate inséndiu sira", iha nível lokal no mós nasional.

"Ba dala uluk hanesan importante atu serbisu polisial sira serbisu hamutuk ho autoridade lokal sira hosi suku hodi permiti alerta lalais bainhira iha inséndiu sira", hatete hosi sekretáriu Estadu.

"No hafoin ne'e presiza tan kapasidade sira ba intervensaun. Bombeiru sira presiza ekipamentu adekuadu sira hodi bele halo intervensaun sira iha ai-laran sira, iha zona sira ne'ebé susar. No ikusmai presiza envolve komunidade iha programa edukasaun nian no prevensaun kona-ba risku hosi inséndiu sira nian", nia hatete.

Demétrio Amaral hatete katak Governu avalia hela kestaun sira seluk iha prazu médiu hanesan dezenvolvimentu hosi kréditu sira karbonu nian hodi ajuda promove rekuperasaun ho biodiversidade ambiental iha zona afetadu sira.

Asuntu sei analiza iha Ministériu oioin no iha ona enkontru boot ida ne'ebé marka ba loron-kuarta hodi haree "posibilidade sira hosi intervensaun Governu nian iha prazu badak ho prazu médiu ho planu sira ba intervensaun ho kombate inséndiu sira nian iha prazu naruk".

Lusa

 


Comentários

Critério de publicação de comentários