Pájina aktualizada iha 21:53h, kuarta-feira 20 Novembru

Indonézia: Ema liu 16.000 resin halai hosi konflitu sira iha Wamena iha Papua

07 de Outubro de 2019, 23:33

Liu ema na'in 16.000 resin halai sai hosi Wamena, sidade ida iha Papua Indonézia nian, ne'ebé iha fulan liubá rejista ona konflitu violentu sira ne'ebé halo ema sanulu resin mate, haktuir hosi kontajen foun ida hosi ezérsitu indonéziu.


Iha loron 23 Setembru, pelumenus ema na'in 30 mate iha sidade ne'e hosi sentru foho provínsia nian, ne'ebé, tuir autoridade sira, vítima oioin ema sunu moris iha inséndiu sira iha rezidénsia sira no iha loja sira bainhira vítima sira seluk hetan sona.

Maioria hosi vítima sira hosi konflitu sira ne'e hanesan migrante sira, ema indonéziu sira hosi parte sira seluk hosi arkipélagu, esplika hosi autoridade sira.

Ema na'in 11.400 resin, inklui ema indonéziu oioin ne'ebé la'ós ema papua, hasai ona liuhosi aviaun militar sira, indika hosi Forsa Aéreu iha loron-segunda ne'e hodi hatutan katak dezde final Setembru maka ema rihun lima resin husik ona fatin ne'e liuhosi semo komersial sira.

Hahú fulan-Agostu, fatin barak iha Papua hasoru manifestasaun sira, balun hamosu konflitu sira, ho sunu edifísiu sira ho konfrontu hasoru polísia.

Ajitasaun hahú hodi hatán ba insidente rasista sira hasoru estudante sira hosi Papua iha Surabaya, sidade boot daruak hosi Indonézia iha illa Javam no iha mós pedidu sira ba referendu ida kona-ba independénsia.

Hasoru konflitu sira ne'e, organizasaun la'ós governu nian Human Rights Watch (HRW) husu ona, iha loron-segunda ne'e, ba autoridade indonéziu sira hodi halo investigasaun independente ida ba konflitu foun sira iha Wamena.

"Komisaun Nasional ba Direitu Ema nian (Komnas Ham) tenki lidera investigasaun ida kona-ba vítima mortal sira ho haree fali polítika hosi polisionamentu Governu nian. Governu indonéziu tenki permiti lalais mós ba gabinente hosi direitu ema nian hosi ONU asesu çahó limiti ba provínsia sira Papua ho Papua Osidental hodi investiga situasaun", hakerek iha komunikadu.

"Pelumenus ema na'in 33 mate ona durante konflitu sira iha Wamena iha sirkunstánsia sira ne'ebé ladún klaru", subliña hosi diretor Human Rights Watch iha Ázia, Brad Adams.

"Presiza investigasaun independente ida hodi ezamina knaar hosi forsa sira seguransa nian ho prosesu ema ruma ne'ebé maka hanesan responsável ba iregularidade sira", nia hatutan.

Lusa

 


Comentários

Critério de publicação de comentários