Pájina aktualizada iha 23:06h, domingu 20 Outubru

Kombatente sira libertasaun nian tenki prepara aan ba validasaun lista sira nian

08 de Outubro de 2019, 19:54

Iha loron-tersa ne'e Governu aviza ona veteranu sira ho kombatente sira libertasaun nasional nian hodi prepara aan ba prosesu verifikasaun ho validasaun hosi lista sira ne'ebé sei hahú iha semana oinmai iha nasaun tomak.


Governu promete mós "toleránsia zero" ba sé maka falsifika dokumentu sira no tenta sai hanesan veteranu sira kombate nian hasoru okupasaun indonéziu.

"Ami hakarak apela ho aviza ba veteranu sira ho kombatente sira hotu hosi libertasaun nasional nian hosi rejistu iha tinan 2009 atu prepara aan ba prosesu verifikasaun ho validasaun", anunsia iha loron-tersa ne'e hosi ministru nomeadu ba Asuntu sira Kombatente hosi Libertasaun Nasional nian no atual prezidente hosi Komisaun Homenajen ho Supervizaun, Rejistu ho Rekursu.

"Sei hanesan prosesu justu ida, klaru hodi garanti atu dignifika sé maka luta ona ba libertasaun nasional", afirma hosi Vergílio Smith.

Ema na'in 160 resin hahú ona iha loron-segunda prosesu rejistu nian, ne'ebé sei demora liu tinan ida, no sei halo iha nível lokal iha nasaun tomak, hodi "valida informasaun sira" hosi rejistu atual sira, ajuda nune'e "rekoñese ho valoriza" veteranu sira nia knaar.

Ekipa hosi "verifikador sira ho validador sira" ne'ebé envolve iha prosesu sei simu formasaun ne'ebé reflete liuliu iha konteúdu hosi estatutu veteranu sira nian ne'ebé agora daudaun benefisia 124.690.

"Ema sira ko'alia nafatin kona-ba veteranu falsu sira. Maibé laiha veteranu falsu sira. Iha ema ne'ebé maka inventa informasaun sira hodi halo sai hanesan veteranu sira", subliña hosi ministru hodi afirma katak estatutu hosi kombatente sira haree ba kastigu sira ba sé maka viola rejistu.

"Ami sei la hatete katak laiha falsidade. Ami kansela ona prosesu oioin no balun halakon ona hosi lista", nia afirma maibé lakohi avansa kona-ba númeru eventual hosi rejistu ilegal sira.

Sekretáriu Estadu ba Asuntu sira Kombatente Libertasaun Nasional nian, Gil da Costa Monteiro "Oan Soru", hatete katak iha kazu falsifikasaun dokumentu nian sei aplika lei no situasaun ida-idak hosi asesu ne'ebé ilegal ba osan públiku sei haruka ba Justisa.

"Sé maka viola lei tenki hatán iha tribunal", nia afirma.

Estututu hosi kombatente sira kalkula katak "sé maka fó deklarasaun ka informasaun falsu sira ka halo dokumentu falsu kona-ba prova militánsia nian iha luta ba libertasaun nasional hodi hetan direitu sira ne'ebé konsagra iha prezente lei, sei hetan kastigu tuir lei sira".

Kastigu ne'e sei tau hamutuk ho lakon kualidade hosi Kombatente Libertasaun Nasional nian bainhira falsifikasaun ne'e halo hosi ema ne'ebé maka hetan ona rekoñesimentu nu'udar veteranu.

Ema timoroan sira ne'ebé rekoñesidu nu'udar veteranu sira ho kombatente sira hasoru okupasaun indonéziu hosi Timor-Leste - ne'ebé dura entre tinan 1975 no 1999 - iha direitu ba pensaun sira sobrevivénsia nian, subsisténsia espesial ka reforma ho valor entre dolar 230 no 575 fulan-fulan.

Dezde tinan 2008, Estadu fahe ona iha pensaun ba veteranu sira valor ida kuaze dolar millaun 800, ho gastu anual ida ne'ebé aumenta de'it hosi millaun 3,6 iha tinan 2008 ba millaun 90 resin atualmente.

Hahú hosi inísiu tinan ne'e selu ona pensaun sira ba veteranu sira iha valor dolar millaun 73 resin, agora daudaun fó ona benefísiu hosi pensaun mensal ba ema rihun 28 resin.

Lusa

 


Comentários

Critério de publicação de comentários