Pájina aktualizada iha 23:06h, domingu 20 Outubru

ONU bele laiha osan to'o fulan ne'e nia rohan, alerta António Guterres

09 de Outubro de 2019, 00:20

Sekretáriu-jeral ONU nian alerta ona katak organizasaun internasional bele laiha osan to'o final fulan ne'e, hodi afirma katak konsidera hela medida sira hodi garanti pagamentu ba saláriu sira to'o tinan ne'e nia rohan.


Alerta hosi António Guterres halo parte iha karta interna ida ne'ebé haruka iha loron-segunda ba funsionáriu sira hosi organizasaun internasional (ema rihun 37 resin maka serbisu ba sekretariadu ONU nian), ne'ebé maka ajénsia notísia France-Presse (AFP) iha asesu.

Iha karta, ne'ebé haktuir hosi AFP iha loron-tersa madrugada, sekretáriu-jeral admiti katak orsamentu operasional ONU nian rejista, dezde final fulan-Setembru nian, défise finanseiru ida iha orden dolar millaun 230 no ne'ebé "rezerva ikus sira hosi tezouraria bele esgota to'o fulan ne'e nia rohan".

Hodi garanti pagamentu saláriu sira hosi estrutura organizasaun nian to'o tinan 2019 nia rohan, tenki foti medida sira, avansa mós hosi reprezentante.

Hodi limita despeza sira durante trimestre ikus tinan ne'e, António Guterres mensiona, hanesan ezemplu, posibilidade hodi adia konferénsia sira ho reuniaun sira ne'ebé previstu ho hamenus serbisu sira ne'ebé maka fó daudaun.

Iha mós instrusaun hodi iha limitasaun ba viajen ofisial sira ba atividade sira ne'ebé konsidera hanesan importante liu, adia akizisaun ba sasán sira ho serbisu sira ho efetua ekonomia enerjétika ida.

"To'o agora, Estadu-membru sira selu de'it 70% hosi montante total ne'ebé presiza ba atividade sira ne'ebé inskrita iha orsamentu ordináriu tinan 2019 nian", indika Guterres hodi refere katak "nia hakerek ona ba Estadu-membru sira iha loron 04 Outubru hodi esplika ba sira katak atividade sira ne'ebé finansiadu liuhosi orsamentu ordináriu iha hela estadu krítiku ida".

Tuir responsável ida hosi ONU, ne'ebé haktuir hosi AFP no lakohi fó sai nia identidade, António Guterres ko'alia ona, iha primavera liubá, ho Estadu-membru sira kona-ba posibilidade hodi aumenta osan sira ne'ebé haruka ba organizasaun internasional, hodi iha marjen ki'ik ida no afasta potensial problema sira tezouraria nian.

Maibé, Estadu-memnru sira rekuza ona, refere hosi fonte hanesan.

La'ós ba dala uluk maka Guterres, ne'ebé asumi lideransa ONU nian iha Janeiru 2017, halo alerta kona-ba saúde finanseiru hosi organizasaun internasional nian.

Iha veraun tinan 2018, sekretáriu-jeral hatete ona, iha karta haruka ba embaixador sira hosi nasaun hamutuk 193 ho asentu iha organizasaun, katak ONU besik laiha osan, no iha kauza maka "atrazu iha pagamentu" hosi kontribuisaun sira hosi Estadu-membru sira.

Iha momentu ne'ebá avansa ona katak hosi nasaun hamutuk 193 iha de'it nasaun 112 maka selu antes nia kontribuisaun sira.

Guterres ko'alia ona entaun iha "situasaun finanseiru problemátiku" no katak rekursu finanseiru sira hosi organizasaun nunka tama iha nível ida "ne'ebé ki'ik tebes no sedu tebes".

Orsamentu operasional hosi ONU ba tinan 2018-2019, la konta ho dotasaun sira ba misaun sira manutensaun dame ONU nian, besik dolar biliaun 5,4.

Estadus Unidus, ne'ebé nia administrasaun lidera hosi Prezidente Donald Trump asumi postura ida todan ho krítika relasionadu ho organizasaun, hanesan kontribuinte prinsipal ONU nian, asumi 22% hosi kontribuisaun sira.

"Iha análize ikus, hanesan Estadu-membru sira maka hanesan responsável sira ba saúde finanseira hosi organizasaun", rekorda António Guterres iha karta ne'ebé divulga hosi AFP iha loron-tersa ne'e, iha referénsia implísita ba nasaun sira ne'ebé la selu nia kontribuisaun ka ne'ebé atraza.

Lusa

 


Comentários

Critério de publicação de comentários