Pájina aktualizada iha 14:23h, kuarta-feira 20 Novembru

EUA hamenus emisaun vistu sira ba funsionáriu sira ne'ebé envolve iha represaun iha Xinjiang

09 de Outubro de 2019, 21:05

Estadus Unidus sei hamenus emisaun hosi vistu sira ba funsionáriu xinés sira ne'ebé iha ligasaun ho detensaun extrajudisial sira hosi musulmanu sira iha Xina, iha fonte foun hosi tensaun entre nasaun rua, bainhira prepara hela hodi hahú fali negosiasaun komersial sira.


Sekretáriu Estadu EUA nian, Mike Pompeo, akuza ona Xina hodi ezekuta "kampaña represiva maka'as ida" hasoru ema uigur sira no ba grupu minoritáriu sira seluk hosi orijen musulmanu iha rejiaun Xinjiang, iha extremu oeste nasaun nian, inklui halo detensaun ba grupu sira, vijilánsia ho rekursu ba teknolojia maka'as no "kontrolu drakonianu" ba espresaun kultural ho relijiozu.

"EUA husu ba Repúblika Popular Xina hodi hakotu lalais nia kampaña represivu iha Xinjiang, liberta ema sira ne'ebé maka kaer arbiru no hapara ona ho esforsu sira hodi obriga membru sira hosi grupu minoritáriu musulmanu xinés sira ne'ebé hela iha estranjeiru hodi fila ba Xina hodi hasoru ho destinu ida ne'ebé la loos", afirma hosi Pompeo iha komunikadu.

Embaixada xineza iha Washington hatán ona ba mensajen oioin, liuhosi rede sosial Twitter, ne'ebé akuza ona EUA hodi halo intervensaun iha asuntu internu sira Xina nian, hodi rekore ba "pretestu sira ne'ebé inventadu", iha violasaun todan ida hosi "norma báziku sira ne'ebé governa relasaun internasional sira".

Medida ne'e mosu liutiha loron ida hafoi Governu Donald Trump nian hamenus ona negósiu sira ho empreza xineza oioin ne'ebé deskonfia iha ligasaun ho represaun iha Xinjiang, no antes reprezentante xinés sira ho norte-amerikanu sira hasoru malu iha Washington, hodi hakarak hapara ho funu komersial entre ekonomia boot rua iha mundu.

Dezde Trump kaer poder, Estadus Unidus hahú dezigna Xina hanesan nia "ameasa prinsipal", aposta iha estratéjia ida luta nian ne'ebé hamosu ona iha funu komersial ida no kampaña diplomátiku ida hasoru abuzu sira hosi direitu ema nian iha nasaun aziátiku.

Pompeo afirma ona katak medida sira sei kastigu funsionáriu sira hosi Partidu Komunista Xinés "ne'ebé fiar hanesan responsável sira ka kúmplise sira iha detensaun" hosi grupu uigur sira iha Xinjiang.

Desizaun la implika atu vistu sira sei rejeita automátika maibé antes "votasaun boot".

Organizasaun la'ós governu sira kalkula katak Xina mantén ema iugur ho kazakés sira hamutuk millaun ida resin iha kampu sira doutrinasaun polítika nian.

Antigu detidu sira relta ona tratamentu ne'ebé ladi'ak ho violénsia no afirma katak obriga sira kritika islaun ho sira nia kultura rasik no jura lealdade ba Partidu Komunista.

Ba dala uluk, hafoin nega ezisténsia hosi kampu sira, Pekin hatete agora katak hanesan sentru sira "formasaun vokasional" nian, destina hodi treina ema uigur sira, hanesan parte hosi planu ida hodi lori minoria étnika sira ba mundu "modernu ho sivilizadu" no halakon kian iha Xinjiang.

Lusa

 


Comentários

Critério de publicação de comentários