Pájina aktualizada iha 14:23h, kuarta-feira 20 Novembru

Mosambike/Eleisaun: HRW kritika observador eleitoral nia mate no husu responsabilizasaun hosi kulpadu sira

09 de Outubro de 2019, 22:22

Investigador hosi organizasaun la'ós governu nian Human Rights Watch (HRW) ba Mosambike ho Angola, Zenaida Machado, kritika ona iha loron-kuarta ne'e asasinatu hosi observador eleitoral ida ba eleisaun jeral sira Mosambike nian no husu ona responsabilizasaun hosi kulpadu sira.


"Observador eleitoral ida nia mate, ativista pasífiku ida, sidadaun ida ne'ebé laiha arma ne'ebé halo hosi forsa seguransa sira hanesan dezastre ida. Hanesan pontu aas ida hosi inkompeténsia hosi sistema tomak hosi aplikasaun lei nian, hosi sistema ida tomak ne'ebé nia funsaun prioritáriu maka proteje sidadaun no la'ós ataka", afirma hosi Zenaida Machado, liuhosi telefone, ba Lusa.

Zenaida Machado, ne'ebé hanesan mós ema mosambikana, refere ba asasinatu hosi Anastácio Matavel, observador eleitoral ida ne'ebé iha loron-segunda ne'e mate tanba tiru hosi grupu ida ne'ebé tuir nia, iha Gaza, iha súl nasaun nian.

Homisídiu ne'e deskonfia halo hosi grupu ida hosi ajente na'in haat ho ema sivil na'in ida, refere hosi porta-vós Polísia Repúblika Mosambike nian iha loron-kuarta ne'e la adianta posibilidade sira ba motivasaun maibé avansa katak sei hahú investigasaun ida.

Identifikasaun hosi suspeitu sira ho inísiu hosi investigasaun ne'e hanesan, ba Zenaida Machado, atitude ida ne'ebé halo organizasaun satisfeitu.

"Ami senti satisfeitu bainhira rona porta-vós polísia nian hatete katak sei iha investigasaun ida no [atu] rezultadu sira sei fó sai iha semana rua nia laran. Ami hein katak investigasaun ne'e sei halo ho dalan profisional ida, imparsial, ho preferénsia inklui ekipa multisetorial sira, hodi nune'e bele hetan lia-loos kona-ba saida maka akontese", afirma hosi Zenaida Machado.

Ba investigadora, "tenki hatene" katak kulpadu sira "halo asaun iha momentu ne'ebá ho orden" hosi ema ruma no "tansá maka halo asaun ida hanesan ne'e".

"Ami hein katak rezultadu sira sei disponível lalais no atu kulpadu sira bele hetan kastigu", hatete hosi responsável HRW nian.

Maibé, Zenaida Machado adverte katak "motivu úniku" tansá maka koñese identifikasaun hosi polísia sira "tanba hetan ona sira, tanba hafoin halo tiha asaun ne'e sira iha asidente ida".

Ba investigadora mosambikanu, polísia "laiha oportunidade ida hodi halai hosi nia responsabilizasaun" no tenki aproveita hodi "hamoos nia imajen".

"Polísia iha responsabilidade hodi hamoos nia imajen agora. Hetan ona ema ruma? Tenki investiga propózitu saida maka hodi halo asaun ne'e, tansá maka halo no saida maka nia objetivu. Presiza hetan ema ruma ne'ebé maka tenki responsabiliza ho dalan ezemplar", nia hatutan.

Zenaida Machado defende ona katak rezultadu sira hosi relatóriu tuir loloos divulga antes eleisaun sira, akredita katak "haruka hela mensajen klaru katak iha kondisaun sira" ne'ebé permiti hala'o eleisaun.

"Iha situasaun ne'ebé maka ita hasoru, iha nafatin klima ida tauk hosi parte ema sira ne'ebé maka sei observa eleisaun sira, hosi parte ema sira ne'ebé maka sei halo kampaña iha loron hirak tuirmai, maibé presiza mós atu polísia halo, hafoin kazu ne'e, pronunsiamentu públiku ida", nia aponta.

Ba HRW, problema liuhosi "impunidade", defende hadi'a "la'ós de'it iha sistema judisial" maibé mós iha "sistema investigasaun polísia nian" no iha "prosesu implementasaun hosi kastigu sira".

"Tenki iha garantia sira katak ema kondenadu sira sei la halai", nia hatutan hodi refere hanesan "momentu atu ministru Defeza ho komandante-jeral polísia nian halo reforma sériu ida iha polísia nia laran, tanba la ezisti asaun ne'ebé maka aat liu" duké sidadaun sira "lakon konfiansa iha forsa seguransa sira".

Sala da Paz, organizasaun ne'ebé maka Anastácio Matavel halo parte hosi observasaun eleitoral, klasifika ona asaun hanesan "bárbaru" no apela ona ba "autoridade kompetente sira ba investigasaun apuradu ida hodi hetan autor sira krimi nian".

Apelu hanesan halo mós iha loron-kuarta ne'e hosi misaun observasaun eleitoral hosi Uniaun Europeia iha Mosambike, ne'ebé husu mós ba líder polítiku-partidáriu sira hodi foti medida sira hodi hapara violénsia maka'as iha kampaña eleitoral mosambikanu nian.

Iha loron 15 Outubru, eleitor mosambikanu millaun 12,9 sei hili Prezidente Repúblika, asembleia provinsial 10 ho nia governador sira, nune'e mós deputadu na'in 250 hosi Asembleia Repúblika.

Lusa

 


Comentários

Critério de publicação de comentários