Pájina aktualizada iha 23:30h, domingu 20 Outubru

Ofensiva hasoru milísia kurdu síriu sei lori "dame ho estabilidade", tuir Prezidente turku

09 de Outubro de 2019, 23:47

Prezidente turku, Recep Tayyip Erdogan, hatete iha loron-kuarta ne'e iha konversa telefónika ho nia homólogu rusu, Vladimir Putin, katak ofensiva turku ida hasoru milísia kurdu síriu sei kontribui ba "dame ho estabilidade" iha Síria.


"Durante konversa ne'e, Prezidente deklara ona katak operasaun militar planeadu ba leste Eufrates nian sei lori ba dame ho estabilidade Síria nian no sei fasilita dalan ba solusaun polítika ida", haktuir fonte ida hosi Prezidénsia turku.

Hafoin operasaun anterior rua, Turkia prepara lansa ofensiva foun ida iha Síria hasoru milísia kurdu hosi Unidade Protesaun Popular (YPG), ne'ebé konsidera hanesan grupu 'terorista' ida maibé ne'ebé hetan apoiu hosi nasaun osidental sira.

Nasaun oioin, inklui Fransa, hatudu preokupadu ho konsekuénsia humanitáriu sira hosi konflitu síriu foun ida, nune'e mós destinu hosi 'jihadista sira' millaun resin hosi grupu extremista Estadu Islámiku (EI) nian ne'ebé maka kaer iha kampu sira ne'ebé kontrola hosi forsa kurdu sira.

Ankara esplika ona katak nia objetivu maka kria "zona seguru" ida ne'ebé bele simu refujiadu síriu sira iha Turkia no haketak fronteira turku hosi pozisaun sira YPG nian.

Hafoin anúnsiu iha domingu, halo hosi White House, kona-ba hasai soldadu norte-amerikanu sira hosi Síria, Prezidente EUA, Donald Trump, halo ona deklarasaun kontemporizador sira, bainhira asegura katak "la husik" kurdu sira no ameasa "estraga ekonomia tomak Turkia nian" bainhira Ankara "ultrapasa limiti sira".

Rúsia ho Turkia, ne'ebé apoia parte diferente iha konflitu síriu, aumenta ona nia koperasaun iha tinan hirak ikus ne'e liuliu iha noroeste Síria nian.

Iha loron-tersa, Moskovo apela ona atu "labele estraga rezolusaun pasífiku" hosi konflitu iha Síria hodi refere ba ofensiva ne'ebé maka Ankara hakarak halo.

Prezidente Vladimir Putin ho nia Konsellu seguransa subliña ona, durante reuniaun, "importánsia, iha momentu atual, hodi evita asaun ruma ne'ebé bele estraga rezolusaun pasífiku ida" hosi konflitu iha kontestu hosi formasaun foun hosi Konsellu konstitusional ida, haktuir hosi porta-vós Dmitri Peskov ne'ebé maka haktuir hosi ajénsia rusu sira.

Bainhira operasaun turku besik akontese, ho destakamentu hosi kombatente sira ho tanke sira millaun resin iha fronteira síriu, porta-vós hosi Prezidente turku ko'alia iha loron-kuarta ne'e ho konselleiru seguransa nasional hosi Prezidente EUA nian, Robert O'Brien.

Tuir Prezidénsia turku, Ibrahim Kalin ho O'Brien ko'alia ona "estabelesimentu hosi zona seguransa nian".

"Ami sei mantén envolvimentu hosi ONU ho nasaun sira hotu, inklui Síria, hodi hetan informasaun kona-ba lala'ok hosi operasaun nian", indika hosi ministru Negósiu Estranjeiru Turkia nian, Mevlüt Cavusoglu, iha loron-kuarta ne'ebé maka haktuir hosi ajénsia estatal Anadolu.

Lusa

 


Comentários

Critério de publicação de comentários