Pájina aktualizada iha 23:30h, domingu 20 Outubru

Governu apela ba sidadania ativa liu iha tinan 250 Díli nian

10 de Outubro de 2019, 19:49

Iha loron-kinta ne'e Governu apela ona ba sidadania ida ne'ebé informadu liu, ativu, partisipativu ho empeñadu ne'ebé kontribui hodi bele moris di'ak liu iha kapital nasaun nian, Díli, ne'ebé selebra iha loron-kinta ne'e tinan 250 hosi nia fundasaun.


"Ita hakarak sidade ida ne'ebé moos, matak ho di'ak hodi moris ho serbisu", refere iha komunikadu ida hosi Governu hodi refere ba selebrasaun sira.

"Ami konvida sidadaun tomak hosi asosia ho selebrasaun sira ne'e, liuhosi sidadania ida ne'ebé informadu liu, ativu, partisipativu ho empeñadu, hodi bele iha dezenvolvimentu di'ak liu hosi ita nia sidade kapital hodi kolabora hamutuk ho Governu ho ho autoridade lokal oioin", subliña.

Ezekutivu nota ona katak kapital timoroan konstitui "símbolu ida Independénsia nian ho dezenvolvimentu nasional nian ba maioria hosi sidadaun nasional sira ho estranjeiru sira".

Tanba ne'e komemorasaun hosi tinan 250 serve hanesan "ezemplu ho referénsia hodi reflete kona-ba prosesu sira konstrusaun, ordenamentu ho planeamentu urbanu, hodi halo sidade ida ne'ebé hakarak sai humanu liu, sustentável ho belun ambiente nian, haktuir ho prátika internasional sira ne'ebé di'ak".

Iha tinan 250 liubá, Díli hanesan aldeia ki'ik ida ne'ebé domina hosi uma sira ne'ebé halo hosi rai-mean ho nu'u nia tahan sira ho "talimatan", du'ut maran ne'ebé metan tebes ne'ebé maka dekora uma tradisional barak iha nasaun.

Hodi haktuir Díli iha tinan 1800, iha obra ho títulu “As Possessões Portuguesas na Oceânia – Descrição da Praça de Dili”, José Joaquim de Sousa hatudu prinsípiu báziku sira hosi povoasaun ne'ebé sai de'it sidade iha tinan 1865.

"Prasa hanesan fatin ida ne'ebé nakonu ho uma du'ut sira... iha serku ne'e nia laran, hosi parte tasi nian, iha Tranqueira, ne'ebé nia muru sira halo hosi fatuk brutu, tau fatuk ida iha fatuk ida seluk nia leten, iha parte seluk ba tasi iha muru rua ho kualidade hanesan, dook malu entre sira iha montaun ida rai ho fatuk no ne'ebé maka iha sasán sira antigu tebes no ho kualidade oioin", nia hakerek.

Sidade ida ne'ebé ladún iha buat barak iha époka ne'ebá, ho konstrusaun ida nakonu iha zona sentral - ohin loron situa Palásiu Governu - no ne'ebé iha kais ki'ik ida ne'ebé permiti deskarga hosi ró sira ho embarkasaun sira.

Iha nia livru “Timor Português”, editadu iha tinan 1956, Hélio Felgas nota ona katak kapital timoroan hetan destruisaun maka'as durante Funu Mundial daruak, no iha tinan 1950 iha "populasaun besik na'in 6.000 ne'ebé metade hanesan ema estranjeiru, entre sira ema portugés sira, indianu sira ho xinés sira".

Felgas rekorda ona katak hanoin transfere kapital ba "Nova Dili", "rejiaun foho ida ho kilómetru 10 hosi súl Díli nian", maibé ikusmai husik tiha projetu ne'e tanba "rejiaun ne'ebé hanesan asidentadu" no despeza ne'ebé aas ne'ebé maka presiza hodi halo nivelamentu, klima ne'ebé húmidu tebes no laiha dalan sira komunikasaun nian.

Nune'e maka hili hodi rekupera Díli, projetu ne'ebé hahú de'it iha tina 1951 no ne'ebé, iha momentu ne'ebé maka hakerek livru ne'e sei hala'o hela.

Kapital Timor Portugés, hanesan naran hosi teritóriu ne'e iha momentu ne'ebá, pasa hosi vila Lifau, iha enklave Oecusse-Ambeno, ba Díli, iha illa Ataúro nia oin, iha tinan 1769.

Pasajen ne'e akontese hafoin tensaun ne'ebé maka akontese iha Lifau iha tinan 1719 tanba, iha parte barak, konflitu regular ho maka'as entre hierarkia relijiozu, liuliu bispu eleitu iha Malaka, Frei Manuel de Santos António ho governador susesivu sira.

Tensaun ida ne'ebé kuaze hamosu funu sivil, ne'ebé envolve ona envenenamentu sira (hosi bispu Geraldo de São José, bispu datoluk ho ikus hosi Malaka ne'ebé maka hela iha Timor) no ne'ebé ikusmai alastra ajitasaun iha reinu Belos.

Iha tinan 1765, governador Dionísio Galvão mate tanba veneno, no deskonfia ba xefe sira hosi grupu armadu sira hosi Oecusse, Antonio da Costa ho Francisco Hornay.

Hodi hatán ba situasaun no avalia situasaun, hosi Goa haruka António José Teles de Meneses ne'ebé bainhira to'o iha Timor hili hodi hasai kapital ba reinu Belos sira nian.

Aproveita ró rua hosi Makau ho hamutuk ho beiru sira ho embarkasaun sira ne'ebé disponível, haruka artillaria tomak hosi prasa ho populasaun hamutuk 1.200 no haruka sunu uma sira ho halo rahun fortifikasaun sira.

Iha loron 11 Agostu 1769 husik Lifau hodi ba Díli ne'ebé instala kapital foun, no atual, Timor-Leste nian.

Lusa

 


Comentários

Critério de publicação de comentários