Pájina aktualizada iha 23:28h, domingu 20 Outubru

Vicente da Silva Guterres hahú simu julgamentu iha Díli

10 de Outubro de 2019, 20:20

Eis-prezidente parlamentu Vicente da Silva Guterres hahú simu julgamentu iha loron-kuarta iha kazu ne'ebé hetan akuzasaun ba benefísiu ekonómiku bainhira sosa karreta sira ba deputadu sira, iha tinan sanulu resin liubá.


Vicente da Silva guterres hanesan koarguidu iha kazu ho ema na'in rua seluk, Rui Amaral, to'o ohin loro hanesan sekretáriu Parlamentu Nasional ho Francisco Guterres, iha momentu ne'ebá hanesan responsável ba aprovizionamentu hosi Ministériu Finansa nian.

Kazu ne'e akontese iha períudu ajitadu iha inísiu 2008 nian, hafoin atentadu hasoru José Ramos-Horta, iha momentu ne'ebá hanesan Prezidente Repúblika, ne'ebé substitui interinamente iha funsaun sira hosi prezidente parlamentu iha momentu ne'ebá, Fernando Lasama de Araújo.

Guterres ikusmai envolve iha kazu tanba asumi interinamente ho durante fulan rua resin, entre 13 Fevereiru ho 17 Abril 2008 - funsaun sira hosi prezidente Parlamentu Nasional nian.

Bainhira asumi knaar sira hala'o hela prosesu ida, ne'ebé hahú hosi Lasama, hodi sosa karreta sira, no husu ona orsamentu sira ba empreza oioin ne'ebé, hafoin avaliasaun, Guterres hili Midori Motors.

Tuir prosesu, ne'ebé maka Lusa iha asesu, empreza kompromete fó Toyota Prado hamutuk 65 ho valor unitáriu hamutuk dolar 33.400, no Guterres esplika, iha ofisíu ida ba Ministériu Finansa, katak hanesan folin ne'ebé baratu liu hosi folin haat ne'ebé maka hetan iha merkadu.

Prosesu hahú ho orsamentu dahuluk ida hamutuk dolar rihun 910 - ne'ebé permiti sosa de'it karreta hamutuk 27.

Iha faze dahuluk, desidi sosa karreta hamutuk 27 - ba meza hosi parlamentu ho ba responsável sira hosi komisaun sira -, antes desidi sosa ona karreta adisional hamutuk 38, totaliza hamutuk 65, karreta ida ba deputadu ida-idak, ho respetivu orsamentu retifikativu ne'ebé aprova hosi deputadu sira (dolar millaun 2,17).

Objetivu dahuluk maka Midori disponibiliza karreta sira iha prazu máximu fulan rua, hatutan hosi prosesu.

Lasama fila ba funsaun sira iha loron 17 Abril no liutiha fulan ida konvoka reuniaun ida ne'ebé esplika katak Midori hatete katak iha susar hodi fornese Prado sira no ne'ebé bele fó de'it Mitsubishi Pajeros, mantén folin unitáriu, maski hanesan karreta inferior sira.

Prezidente parlamentu, Lasama de Araújo, informa katak troka karreta sira aseita ona - haktuir hosi dokumentu sira ne'ebé maka Lusa iha asesu no ne'ebé halo parte hosi prosesu - ho Midori hahú entrega sira.

Maibé, liutiha tempu balun, empreza hatete fali katak la konsege kumpri kontratu hodi entrega karreta hamutuk 65, entrega de'it 27, no Ministériu Finansa hili hodi halo konkursu foun ida ba karreta 38 seluk.

Empreza oioin konkorre ona ba konkursu ne'e no manán ona empreza ida ne'ebé oferese karreta sira ho folin unitáriu dolar 33.000.

Ekipa sira investigasaun nian hosi Komisaun Antikorupsaun komprova katak folin sira ne'e hanesan ki'ik hosi folin sira merkadu nian ne'ebé maka pratika iha Díli iha momentu ne'ebá.

Ministériu Públiku akuza Vicente da Silva Guterres hodi fó benefísiu diretu ho negósiu ho folin ida ne'ebé koresponde ba diferensa hosi folin unitáriu - dolar 400 ba karreta ida hosi karreta dahuluk hamutuk 27 ka total ida dolar 10.800.

Prokurador sira sustenta katak laiha justifikasaun ba prosedimentu urjente, katak arguidu sira la respeita prosesu sira aprovizionamentu no ne'ebé permiti ona ba empreza hodi muda sasán kontratadu sira.

Sasin na'in rua hosi defeza Guterres nian, Lasama rasik - ne'ebé asumi ona iha deklarasaun públika sira tanba jestaun tomak hosi sosa ne'e - no deputadu ida seluk, mate ona.

Sasin datoluk, ne'ebé iha momentu ne'ebá nu'udar ministra Finansa, Emília Pires, iha hela estranjeiru.

Kazu ne'e dura kleur ona no marka tiha ona ba julgamentu iha inísiu tinan 2015 no, iha momentu ne'ebá, Vicente da Silva Guterres rasik - nu'udar prezidente Parlamentu Nasional - defende ona atu kazu ne'e transmiti diretu iha televizaun.

Sesaun julgamentu foun marka ba loron 21 Outubru.

Lusa

 


Comentários

Critério de publicação de comentários