Pájina aktualizada iha 10:04h, sesta-feira 13 Dezembru

Ministru indonéziu Wiranto estável hafoin ema sona dala rua

11 de Outubro de 2019, 00:31

Ministru Kordenador Seguransa indonéziu nian, Wiranto, iha ospital ho kondisaun estável hafoin hetan sona dala rua hosi mane ida ne'ebé ikusmai polísia kaer, konfirma hosi autoridade sira.


Atake hasoru Wiranto akontese bainhira ministru indonéziu sai hosi karreta durante vizita ida ba sidade Pandeglang, iha provínsia javaneza Banten.

Porta-vós hosi ospital Berkah, Fismansyah, esplika katak Wirante iha "kanek klean rua" maibé iha kondisaun estável ho konsiente, sei transfere nune'e ba ospital ida iha Jakarta hodi bele hala'o intervensaun sirúrjika.

Porta-vós hosi polísia nasional, Dedi Prasetyo, konfirma ona katak suspeitu hosi akontesimentu sona ne'e ho feto ida kaer ona no agora halo hela interogatóriu, ho imprensa indonéziu aponta katak bele hanesan extremista islámiku sira.

Fonte polísia sira nian ne'ebé haktuir hosi France-Presse indika katak atakante "expostu ba radikalizmu islámiku", bainhira imprensa seluk refere ba momentu atual hosi tensaun iha provínsia Papua Osidental.

Wiranto, tinan 72, nomeadu hosi prezidente indonéziu, Joko Widodo, nu'udar responsável ba rezolusaun hosi konfrontu sira ne'ebé akontese iha semana hirak ikus ne'e iha rejiaun.

Vídeo sira ne'ebé sai koñesidu iha rede sosial sira hatudu ministru monu hosi nia karreta bainhira mane ida ho kamizola metan hakbesik ho sona, hafoin ne'e maka Wiranto monu ba rai.

Wiranto besik tama iha helikópteru ida ne'ebé lori nia ba kapital indonéziu, esplika hosi sasin sira, hodi nota katak lori lalais ministru ba ospital.

Ministru kordenador Seguransa nian uluk haneasn responsável militar indonéziu sira iha final hosi okupasaun indonéziu iha Timor-Leste, hetan akuzasaun ba abuzu oioin ne'ebé halo iha teritóriu.

Wiranto nunka hetan akuzasaun formal ba krimi ruma no agora daudaun kordena Ministériu lima inklui Negósiu Estranjeiru, Interior ho Defeza.

Papua Osidental sai hanesan palku hosi konflitu maka'as iha fulan liubá ne'ebé halo ona ema na'in sanulu resin mate no ema rihun resin sai deslokadu.

Ajitasaun hahú hodi hatán ba insidente rasista sira hasoru estudante sira hosi Papua iha Surabaya, sidade boot daruak iha Indonézia iha illa Java, no relansa mós pedidu sira ba referendu ida ba independénsia.

Lusa

 


Comentários

Critério de publicação de comentários