Pájina aktualizada iha 12:33h, tersa-feira 10 Dezembru

Eskritor Olga Tokarczuk ho Peter Handke manán Prémiu Nobel Literatura 2018 ho 2019 nian

11 de Outubro de 2019, 01:40

Eskritora polaka Olga Tokarczuk ho austríaku Peter Handke sai premiadu ho Prémiu Nobel Literatura nian ba tinan 2018 ho 2019, anunsia hosi Akademia Sueka iha loron-kinta ne'e.


Prémiu Nobel sira Literatura nian ba tinan 2018 ho 2019 anunsia ona iha loron-kinta ne'e iha Estokolmo hosi Akademia Sueka, hafoin interupsaun tinan ida tanba eskándalu hosi abuzu seksual no krimi finanseiru sira ne'ebé maka akontese iha organizasaun.

Akademia Sueka fó Nobel Literatura 2018 nian ba Olga Tokarczuk, ho tinan 57, "tanba imajinasaun narativu ida ne'ebé, ho paixaun ensiklopédiku, reprezenta kruzamentu hosi fronteira sira hanesan dalan moris ida nian".

Ba Akademia Sueka, eskritora "nunka haree realidade hanesan buat estável ida ka permanente" no "harii nia romanse sira iha tensaun ida entre kultura sira ne'ebé la hanesan; natureza "versus" kultura, razaun "versus" loukura, maskulinu "versus" femininu, uma "versus" alienasaun".

"Obra boor" hosi laureada to'o agora hanesan, ba akademia, "romanse impresionante istóriku 'Ksiegi Jakubowe' ['Jacob nia livru sira' iha tradusaun livre]", publika iha tinan 2014 lahó edisaun iha lian portugés. Olga Tokarczuk hatudu iha serbisu ne'e "kapasidade aas hosi romanse hodi reprezenta kazu ida kuaze aleinde komprensaun ema nian".

"Viagens" hanesan livru ida to'o agora iha Portugal hosi Olga Tokarczuk, feto dala 15 ne'ebé maka hetan prémiu Nobel Literatura nian, iha premiadu na'in 116.

Nobel Literatura 2019 nian fó ba Peter Handke, tinan 76, "tanba serbisu influente ida ne'ebé, ho enjeñu linguístiku, esplora ona periferia ho espesifisidade hosi esperiénsia ema nian".

Ba Akademia Sueka, "arte espesial" hosi Peter Handke hanesan "atensaun estraordináriu ba paizajen sira ho prezensa material mundu nian ne'ebé halo hosi sinema ho pintura hanesa nia fonte inspirasaun rua maka'as".

Peter Handke, "produz nafatin númeru boot ida hosi obra sira iha jéneru oioin, estabelese ona hanesan eskritór influente ida iha Europa hafoin Funu Mundial Daruak".

"A Mulher Canhota", "A Angústia do Guarda Redes antes do Penalti" hanesan livru balun hosi Peter Handke ne'ebé maka edita iha Portugal. "Os Belos Dias de Aranjuez - Um diálogo de Verão" publika ona hosi Documenta iha 2014.

Tuir sekretáriu Akademia Sueka nian, Anders Olsson, lista hosi finalista sira hosi Nobel Literatura tinan 2018 ho 2019 nian komposta hosi naran ualu.

Laureadu sira simu, ida-idak, prémiu osan hamutuk millaun sia koroa sueka nian (euro rihun 830 resin), medalla osan-mean ida ho diploma ida ne'ebé sei entrega iha serimónia ida iha Estokolmo iha loron 10 Dezembru.

Total ida hosi eskritor na'in 116 - na'in 15 hanesan feto - hetan ona prémiu Nobel Literatura nian ne'ebé maka fó dezde tinan 1901.

Iha de'it autor na'in ida ho lian portugeza maka premiadu: portugés José Saramago, iha tinan 1998.

Lusa

 


Comentários

Critério de publicação de comentários