Pájina aktualizada iha 22:42h, domingu 17 Novembru

Nobel Dame nian fó ba primeiru-ministru etíope Abiy Ahmed

11 de Outubro de 2019, 23:13

Prémiu Nobel Dame nian fó ona iha loron-sesta ne'e ba primeiru-ministru etíope, Abiy Ahmed Ali, informa hosi Komité Nobel noruegés.


Tuir komunikadu ne'ebé fó sai hosi júri, prémiu fó ba primeiru-ministru Etiópia nian tanba nia serbisu importante hodi promove rekonsiliasaun, solidariedade ho justisa sosial, "hodi hetan dame ho koperasaun internasional, liuliu tanba nia inisiativa importante hodi rezolve konflitu ho viziñu Eritreia".

"Prémiu hakarak rekoñese mós parte interesadu tomak ne'ebé maka serbisu ba dame ho rekonsiliasaun iha Etiópia ho rejiaun sira leste ho nordeste Áfrika nian", subliña hosi nota.

"Abiy Ahmed Ali hahú ona reforma importante sira ne'ebé proporsiona ba sidadaun barak esperansa hosi moris di'ak ida ho futuru di'ak ida", hatutan hosi komunikadu.

Komité Noruegés Nobel nian fiar katak agroa maka esforsu sira hosi Abiy Ahmed merese rekoñesimentu ho presiza insentivu, hatete hosi prezidente komité nian, Berit Reiss-Andersen.

"Bainhira Abiy Ahmed sai nu'udar primeiru-ministru, iha Abril 2018, husik klaru katak nia hakarak hahú fali negosiasaun sira dame nian ho Eritreia. Hamutuk ho Isaias Afwerki, Prezidente Eritreia nian, Abiy Ahmed elabora lalais prinsípiu sira hosi akordu dame ida hodi hakotu ho konflitu naruk "lahó dame, lahó funu" entre nasaun rua", indika hosi nota.

Tuir dokumentu, prinsípiu sira ne'e estabelese iha deklarasaun sira ne'ebé primeiru-ministru Abiy ho Prezidente Afwerki asina ona iha Asmara ho Jeddah, iha Jullu ho Setembru.

"Premisa importante ida ba avansa maka disponibilidade inkondisional hosi Abiy Ahmed hodi aseita desizaun hosi arbitrajen hosi komisaun internasional ida hosi fronteira sira nian iha 2002", subliña hosi komunikadu.

Tuir nota, "dame la mosu de'it hosi asaun sira hosi parte ida. Bainhira primeiru-ministru Abiy fó liman, Prezidente Afwerki komprende ona no ajuda ona formaliza prosesu dame nian entre nasaun rua. Komité Nobel noruegés hein mudansa ida pozitivu ba povu Etiópia ho Eritreia nian".

"Iha Etiópia, maski sei iha serbisu barak atu halo, Abiy Ahmed hahú ona reforma importante sira ne'ebé fó ona ba sidadaun barak esperansa sira ba moris di'ak ida ho futuru di'ak ida", indika hosi komunikadu.

Tuir nota, Abiy "pasa nia loron 100 dahuluk nu'udar primeiru-ministru hodi foti estadu emerjénsia nasaun nian, fó amnistia ba prezu polítiku millaun resin, interompe sensura ba media, legaliza grupu sira opozisaun ne'ebé maka antes hetan bandu, demiti líder militar sira ho sivil sira ne'ebé deskonfia halo korupsaun ho aumenta maka'as influénsia hosi feto sira iha polítika ho moris komunitáriu Etiópia nian".

Primeiru-ministru etíope mós promete fortalese demokrasia, hodi halo eleisaun livre ho justu.

Hafoin prosesu dame ho Eritreia, tuir nota, "primeiru-ministru Abiy envolve ona iha prosesu sira seluk dame no rekonsiliasaun nian iha leste ho nordeste Áfrika nian".

Komité Nobel noruegés hein katak Prémiu Nobel Dame nian fortalese primeiru-ministru Abiy iha nia serbisu importante ba dame ho rekonsiliasaun.

Etiópia hanesan nasaun daruak ho populasaun barak tebes iha Áfrika no iha ekonomia boot hosi Áfrika Oriental.

"Etiópia pasífiku ida, estável ho susesu sei lori efeitu pozitivu maka'as ho sei ajuda hametin fraternidade entre nasaun sira ho povu sira hosi rejiaun. Ho dispozisaun sira hosi Alfred Nobel nia vontade iha hanoin, Komité Nobel Noruega nian haree Abiy Ahmed nu'udar ema ida ne'ebé iha tinan anterior halo asaun máximu hodi merese Prémiu Nobel Dame tinan 2019 nian", subliña hosi komunikadu.

Nobel, ne'ebé konsisti iha diploma ida, medalla osan-mean ida ho cheque ida hamutuk millaun sia koroa sueku (besik euro rihun 830), sei entrega iha Oslo iha loron 10 Dezembru, aniversáriu ba loron mate hosi fundador nian, industrial ho filantropu sueku Alfred Nobel (1833-1896).

Dezde tinan 1901 maka fó ona prémiu Nobel Dame hamutuk 99.

Nobel sira seluk anunsia ona iha Estokolmo, Nobel Dame nian hanesan úniku ne'ebé maka fó iha Oslo tanba desizaun ne'ebé hatudu hosi Alfred Nobel.

Iha tinan liubá, prémiu ne'e fó ba médiku kongolés Denis Mukwege ho ativista direitu ema nian Nadia Murad tanba esforsu sira hosi premiadu na'in rua hodi hakotu ho violénsia seksual hanesan arma iha konflitu sira ho funu sira iha mundu tomak.

Lusa

 


Comentários

Critério de publicação de comentários