Pájina aktualizada iha 22:40h, domingu 17 Novembru

Vensedor Nobel Dame nian hatete katak ne'e hanesan prémiu ida "fó ba Áfrika"

12 de Outubro de 2019, 00:18

Primeiru-ministru Etiópia nian, Abiy Ahmed, vensedor Nobel Dame nian iha tinan ne'e, hatete iha loron-sesta katak sente "honradu" ho "enkantadu" no konsidera ona katak ne'e hanesan "prémiu ida ne'ebé fó ba Áfrika".


"Ha'u fiar katak líder sira seluk hosi Áfrika hanoin katak bele serbisu iha prosesu sira kontrusaun dame nian iha ami nia kontinente", hatete hosi joven líder etíope iha konversa badak ida ho instituisaun sira Nobel nian.

Ema etíope barak maka hatudu ona nia ksolok ho entrega hosi prémiu Nobel Dame ba primeiru-ministru reformista ho balun muda daudaun sira nia foto perfil, iha rede sosial sira, ba foto hosi Abiy Ahmed nian.

Maski sira ne'ebé maka uluk presiona Abiy hodi halo tan asaun barak, agora fó elojiu.

Ativista proeminente Jawar Mohammed hatete katak prémiu hanesan "rekoñesimentu meresidu ida, tanba responsável ne'e hakotu ona ho susar ne'ebé lahó sentidu ho Eritreia" no hakotu ona konflitu ida antigu liu iha Áfrika.

Maibé hatutan katak sei iha servisu barak hodi garanti "tranzisaun pasífiku ho susesu hosi demokrasia iha Etiópia", hodi alerta katak realizasaun rejional sira hosi Abiy depende hosi dame internu hosi nia nasaun.

Prémiu Nobel Dame nian fó ona iha loron-sesta ne'e ba primeiru-ministru etíope, Abiy Ahmed Ali, informa hosi Komité Nobel noruegés.

Tuir komunikadu ne'ebé fó sai hosi júri, prémiu fó ba primeiru-ministru Etiópia nian tanba nia serbisu importante hodi promove rekonsiliasaun, solidariedade ho justisa sosial.

Prémiu hakarak rekoñese mós "parte interesadu tomak ne'ebé maka serbisu ba dame ho rekonsiliasaun iha Etiópia ho rejiaun sira leste ho nordeste Áfrika nian", subliña hosi nota.

"Abiy Ahmed Ali hahú ona reforma importante sira ne'ebé proporsiona ba sidadaun barak esperansa hosi moris di'ak ida ho futuru di'ak ida", hatutan hosi komunikadu.

Komité Noruegés Nobel nian fiar katak agroa maka esforsu sira hosi Abiy Ahmed merese rekoñesimentu ho presiza insentivu.

Iha tinan liubá, prémiu ne'e fó ba médiku kongolés Denis Mukwege ho ativista direitu ema nian Nadia Murad tanba esforsu sira hosi premiadu na'in rua hodi hakotu ho violénsia seksual hanesan arma iha konflitu sira ho funu sira iha mundu tomak.

Lusa

 


Comentários

Critério de publicação de comentários