Pájina aktualizada iha 22:40h, domingu 17 Novembru

Governu timoroan akompaña situasaun iha Guiné-Bissau ho preokupasaun

05 de Novembro de 2019, 20:41

Governu timoroan akompaña hela ho preokupasaun situasaun iha Guiné-Bissau, konsidera hanesan importante atu lei sira ho konstituisaun nasaun nian tenki hetan respeitu iha kuadru hosi prosesu eleitoral ne'ebé halo daudaun.


"Eleisaun sira marka ona, iha insidente ida ne'ebé hamosu fali situasaun atual ne'e. Hanesan kestaun internu ida, maibé ami apela atu respeita lei sira ho konstituisaun", hatete hosi ministru Negósiu Estranjeiru, Dionísio Babo, ba Lusa.

"Importante maka bele hala'o eleisaun sira ho dalan demokrátiku ho tuir lei ho konstituisaun", nia afirma.

Babo rekorda katak Governu timoroan apoia nafatin prosesu eleitoral iha Guiné-Bissau no katak, bainhira situasaun sai aat, apoiu ne'e "bele iha risku".

Iha fulan-Setembru, Konsellu Ministru aprova ona pakote apoiu ida hamutuk dolar rihun 300 ba asisténsia téknika ho finanseiru ba organizasaun ho realizasaun hosi eleisaun prezidensial sira ne'ebé maka husu hosi Governu guiniense.

Tomás do Rosário Cabral nomeia ona ba Reprezentante Espesial Governu nian, ho misaun "prosede ba identifikasaun hosi susar sira hodi organiza ho hala'o operasaun sira resenseamentu eleitoral ho eleisaun sira ne'ebé livre ho justu".

Kona-ba situasaun iha Guiné, Governu timoroan esplika iha komunikadu katak "akompaña hela ho preokupasaun kona-ba dezenvolvimentu hosi situasaun polítika iha Guiné-Bissau", hodi apela "ba ator polítiku sira hotu hodi mantén postura ida rigor ho observánsia estrita hosi orden konstitusional ho lei sira ne'ebé hala'o iha nasaun".

"Governu Timor-Leste hatudu mós nia solidariedade ba povu irmaun hosi Guiné-Bissau ho apoiu atu eleisaun prezidensial sira, ne'ebé marka ba loron 24 Novembru oinmai, hala'o iha ambiente ida hakmatek ho seguransa hodi permiti ba Guiné-Bissau la'o ba estabilidade ho dezenvolvimentu", refere.

Rekorda katak Prezidente guiniese, José Mário Vaz, kandidatu ba eleisaun prezidensial no ne'ebé nia mandatu hotu ona iha loron 23 Juñu, demiti ona iha loron-segunda Governu ne'ebé lidera hosi Aristides Gomes no nomeia iha loron tuirmai Faustino Imbali nu'udar primeiru-ministru Guiné-Bissau nian.

Uniaun Afrikanu, Uniaun Europeia, CEDEAO, CPLP ho ONU kondena ona desizaun hosi Prezidente José Mário Vaz no hatete ona katak rekoñese de'it Governu ne'ebé harii hosi eleisaun lejislativu sira loron 10 Marsu liubá ne'ebé maka sei hala'o hela funsaun sira.

Guiné-Bissau iha prezidensial sira ne'ebé marka ba loron 24 Novembru no bainhira presiza halo volta daruak entaun sei halo iha loron 29 Dezembru.

Lusa

 


Comentários

Critério de publicação de comentários