Pájina aktualizada iha 22:40h, domingu 17 Novembru

UE hakarak relasaun estratéjiku ho polítika liu, hamutuk ho koperasaun, ho Timor-Leste

06 de Novembro de 2019, 01:05

António Sampaio, hosi ajénsia Lusa

Uniaun Europeia (UE) hakarak relasaun ida "estratéjiku ho polítika liu" ho Timor-Leste, reforsa iha tempu hanesan ajenda koperasaun nian liuhosi dalan foun ida finansiamentu nian, hatete hosi embaixador europeu foun iha Díli ba Lusa.


"Ami nia relasaun ho Timor-Leste tenki sai hanesan estratéjiku ho polítika liu", hatete hosi Andrew Jacobs iha nia entrevista dahuluk dezde aprezenta kredensial sira iha Díli.

"Ami sei kontinua hanesan parseiru ida koperasaun nian ba dezenvolvimentu, maibé ami hakarak reforsa diálogu iha ámbitu hosi ONU, hanesan ezemplu, tanba ami fahe prinsípiu sira direitu ema nian, demokrasia, ho preokupasaun sira kona-ba mudansa klimátika sira", nia konsidera.

Andrew Jacobs, ne'ebé aprezenta ona kredensial sira nu'udar embaixador iha loron 15 Outubru, uluk sai ona nu'udar embaixador iha Pasífiku (ho sede iha Illa Fiji), no destakadu iha Vietname ho Tailándia ne'ebé sai nu'udar responsável ba koperasaun europeia ho rejiaun.

To'o iha Díli iha faze ikus hosi kuadru koperasaun atual no bainhira hala'o hela negosiasaun sira kona-ba futuru hosi asisténsia europeia ne'ebé, antesipa, sei sai reforsadu.

Programa apoiu europeu nian ba Timor-Leste, iha ámbitu hosi Fundu Europeia Dezenvolvimentu ba dala 11 (2014-2020), totaliza hamutuk euro millaun 95, ne'ebé euro millaun 15 tinan ne'e, fahe, liuliu, entre área hosi governasaun di'ak (euro millaun 30), dezenvolvimentu rural (euro millaun 57) ho medida sira apoiu nian (euro millaun ualu).

Nia afirma katak UE agora analiza hela hamutuk ho Governu timoroan formatu ho prioridade sira hosi kanal orsamentu tuirmai, buka hametin serbisu ne'ebé maka halo ona to'o agora, liuliu iha área sira ne'ebé UE "aumenta ona valor" hanesan governasaun di'ak ho dezenvolvimentu rural.

Jacobs hatete katak UE "iha preferénsia ba apoiu orsamental diretu", asaun ne'ebé halo ona parte hosi asisténsia ba Timor-Leste, ne'ebé fundu sira destina no liberta diretamente ba Tezouro bainhira hetan akordu antes ba 'benchmarks'.

Modelu ida ne'ebé sei kontinua ho ne'ebé permiti atu diálogu "sentra liu iha polítika sira, liuliu ba área sira nutrisaun ho jestaun hosi finansa públika sira".

"Ami senti haksolok kona-ba oinsá maka asaun sira hala'o hela. Permiti serbisu iha nível seluk, kona-ba polítika sira, ko'alia ho ami nia parseiru sira kona-ba dezafiu sira ne'ebé maka iha no asaun ne'ebé maka bele halo", nia refere.

"Maibé ha'u la fiar katak sei to'o momentu ida ne'ebé ami sei halo de'it apoiu orsamental. Ami hakarak, hanesan ezemplu, reforsa ami nia koperasaun ho sosiedade sivil ne'ebé iha knaar importante tebes iha dezenvolvimentu ho iha kumprimentu hosi objetivu sira dezenvolvimentu sustentável nian, direitu ema sira nian ka iha kombate hasoru violénsia jéneru nian", nia hatete.

To'o agora, Timor-Leste hanesan signatáriu ida hosi Akordu Cotonou, programa kuadru koperasaun europeia nian ho Áfrika, Karaíba ho Pasífiku ne'ebé sei hotu no ne'ebé, tuir Jacobs, sei troka ho akordu foun ida, ho "baze sira ne'ebé la hanesan ba rejiaun tolu, reflete prioridade sira ho dezafiu espesífiku sira hosi rejiaun sira ne'e".

Maibé, bainhira proposta hosi Komisaun Europeia aseita hosi Estadu-membru sira, sei laiha fundu ida dezenvolvimentu nian diretamenta ligadu ba akordu foun Cotonou nian no sei iha "orsamentu global ida ba koperasaun tomak hosi UE iha mundu tomak".

"Agora daudaun, Timor-Leste hanesan benefisiáriu hosi Fundu Europeu hosi Dezenvolvimentu ne'ebé iha ligasaun ba akordu Cotonou. Maibé koperasaun ho Indonézia, hanesan ezemplu, mai hosi 'bolu' ida ne'ebé la hanesan", nia hatete.

"Hanesan susar envolve Timor-Leste iha programa sira ne'ebé viza sudeste aziátiku tanba iha regra sira ne'ebé la hanesan no fundu sira ne'ebé la hanesan", nia nota.

Ho instrumentu global, Díli bele iha asesu ba programa sira pasífiku nian nune'e mós hosi Ázia, nune'e "hanesan importante iha termu sira ambisaun sira Timor-Leste nian iha ASEAN".

Nia hatete katak iha nível global, Komisaun Europeia husu ona euro biliaun 89,2 ba 'bolu' global ne'e hosi Programa Dezenvolvimentu hosi Viziñansa ho Koperasaun Internasional, ne'ebé millaun rihun 10 sei fó ba Ázia ho Pasífiku.

"Ne'e sei fó tan fleksibilidade mai ami iha forma oinsá ami serbisu ho Timor-Leste", nia hatete.

Diplomata esplika katak objetivu maka garanti "komunikasaun efetivu ho vizibilidade kona-ba saida maka UE halo daudaun", reforsa papel ne'ebé Europa bele iha hanesan "forsa estabilidade nian no kontinuidade".

"Ami favorese multilateralizmu, serbisu ho parseiru sira hanesan TL hodi sustenta respeitu hosi direitu internasional. Ami presiza ko'alia maka'as kona-ba ami nia ambisaun sira ho preokupasaun sira", nia hatete.

Hosi instrumentu foun ba finansiamentu europeu nian, sei halo parte mós aposta ida hodi hadi'a kondisaun sira hodi halo negósiu ho hametin investimentu.

"Iha dezafiu sira iha Timor-Leste ne'ebé ladún sai hanesan atrativu ba investidor sira, no ami hakarak apoia iha área ne'e. Sei hanesan parte importante ida hosi ami nia koperasaun ho nasaun oioin iha mundu hodi ajuda hadi'a problema balun ne'ebé maka bele akontese iha nível regulamentu kona-ba kriasaun hosi empreza sira ka iha aspetu sira seluk, nia hatete.

Jacobs hatudu satisfeitu ho dalan oinsá koperasaun delegadu, inklui parseria ho Camões, hala'o daudaun, no esplika katak hakarak hametin koperasaun ho sosiedade sivil.

"Sosiedade sivil iha knaar importante ida iha advokasia, hodi husu konta sira ba Governu hodi garanti atu bele hala'o reforma sira. Tanba ne'e ami serbisu hodi ajuda reforsa kapasidade hosi sosiedade sivil hodi konsege diálogu ida efikas ho governu kona-ba asuntu importante sira", nia hatete.

Lusa

 


Comentários

Critério de publicação de comentários