Pájina aktualizada iha 22:40h, domingu 17 Novembru

Governu timoroan husu 'agrément' ba embaixador foun hamutuk na'in 14

06 de Novembro de 2019, 01:24

Governu timoroan aprezenta ona ba nasaun oioin, inklui Portugal, pedidu sira hosi 'agrément' ba embaixador foun na'in 14 ba postu diplomátiku sira ne'ebé maka mamuk hela, balun mamuk durante tinan ida resin ona, konfirma hosi ministru ne'ebé kaer asuntu ne'e.


"Husu ona pedidu 'agrément' ba kuaze nasaun tomak. Pedidu tolu ikus sai ohin", hatete hosi Dionísio Babo iha deklarasaun sira ba Lusa.

Babo hatudu fiar katak 'agrément' sira hosi nasaun oioin bele to'o iha semana hirak tuirmai ne'e, permiti nune'e tomada pose hosi diplomata sira iha tinan ne'e nia laran.

"Ami tenta atu akontese durante tinan ne'e, maibé bainhira labele sei halo iha inísiu tinan 2020 nian", nia esplika.

Iha kazu Portugal nian maka haruka ona pedidu 'agrément' nian ba diplomata proposta, Isabel Amaral Guterres, eis-ministra Solidaridade Sosial Timor-Leste nian.

Rekorda katak Dionísio Babo aprezenta ona ba xefe Estadu, Francisco Guterres Lu-Olo, lista ida hosi naran hamutuk 14, iha loron 22 Outubru liubá.

Iha kauza maka naran sira ne'ebé aprova iha Konsellu Ministru sira hodi lidera misaun diplomátiku timoroan sira iha Austrália, Cabo Verde, Kamboja, Xina, Irlanda-Norte, Japaun, Laos, Mosambike, Portugal, Reinu Unidu, Sekretariadu CPLP, Singapura, Suísa, Tailándia ho Vatikano.

Hafoin aprova ona naran sira, Prezidénsia sei haruka lista ba ministru Negósiu Estranjeiru sira, Dionísio Babo, ne'ebé sei husu agrément sira hosi nasaun sira ne0ebé maka diplomata sira sei hetan destakadu.

Bainhira agrément sira hetan, diplomata sira sei simu pose iha Díli antes asumi funsaun sira.

Nomeasaun hosi diplomata sira hetan adia beibeik durante tinan ikus ne'e, ho lista ida ne'ebé maka aprezenta hosi Governu anterior no ida seluk hosi governu atual, lista sira ne'e laiha ida maka hetan implementasaun.

Fonte diplomátika hatete ona ba Lusa katak iha kazu Portugal nian fó ona 'agrément' ida ba proposta hosi embaixador ba Lisboa ne'ebé aprezenta hosi Governu anterior, Armindo Maia, eis-ministru Edukasaun ho naran ida ne'ebé la hanesan ne'ebé hato'o hosi governu atual.

Iha ínisu tinan ne'e, ezekutivu foun haruka lista ida ho naran hamutuk 16 ba embaixada sira iha mundu tomak, ne'ebé simu de'it pose ema na'in tolu.

Dionísio Babo esplika katak hafoin konsulta maka'as, prepara ona lista ida ho naran 16 ne'ebé maka haruka ona ba Governu no diskuti ona no hetan aprovasaun iha Konsellu Ministru sira, no haruka ona hosi primeiru-ministru Taur Matan Ruak ba xefe Estadu.

Hosi grupu ne'e, simu de'it 'agrément' nesesáriu iha kazu hosi embaixador na'in tolu ne'ebé maka simu ona pose - iha Brazil, Estadus Unidus ho Nova Zelándia -, no diplomata sira destaka ona iha nasaun sira ne'e ho funsaun sira.

Lusa

 


Comentários

Critério de publicação de comentários