Pájina aktualizada iha 22:38h, domingu 17 Novembru

Timor Resources hahú perfurasaun petrolíferu sira iha Marsu iha parte súl nasaun nian

06 de Novembro de 2019, 22:00

Timor Resources hahú perfurasaun petrolíferu sira iha posu tolu iha rejiaun Suai, iha parte súl hosi Díli, ne'ebé kalkula katak iha rezerva sira hamutuk baril millaun 143, hatete hosi responsável ba Lusa.


"Ami kompleta teste sísmiku iha Betanu ho Suai no ami iha ona rezultadu ofisial sira hosi teste sira iha Suai ne'ebé hatudu fatin lima ba perfurasaun, ne'ebé iha fulan-Marsu ami sei hahú fura tolu", hatete hosi Filomeno de Andrade, responsável máximu hosi Timor Resources (TR) iha Timor-Leste, ba Lusa.

Filomeno de Andrade hatutan ona katak senáriu "médiu" hatudu ba "previzaun sira hosi barik millaun 143" iha posu tolu ne'ebé sei hahú fura, antesipad katak produsaun hahú iha trimestre ikus hosi tinan 2020.

Nia hatete katak agora hala'o hela análiza ambiental ikus ida, ho ekipa sira iha fatin hodi rekolla ezemplu sira rai nian, bee ho ár, hodi kompleta prosesu ikus sira antes instala material sira hodi fura nian.

"Atividade sira ne'e hala'o hela. Ami konklui mós konsulta sira ba komunidade sira. To'o agora laiha problema sira ho komunidade lokal sira ne'ebé sei partisipa, iha serbisu diretu sira no mós iha serbisu indiretu sira", nia esplika.

Nia hatete katak ekipamentu nesesáriu prepara hela mós iha Indonézia no Estadus Unidus hodi haruka ba Timor-Leste no sei harii tanki ualu iha Suai Loro, hodi rai mina sira ne'ebé ikusmai sei fa'an, iha brutu, ba estranjeiru.

"Ami iha esperansa maka'as katak rezultadu sira sei lori benefísiu la'ós de'it ba kompañia maibé mós ba Timor-Leste", nia hatete.

"Ami senti satisfeitu tanba serbisu pioneiru iha Timor, ba kolaborasaun ne'ebé maka'as tebes ho Autoridade Nasional Petróleu nian no ha'u nu'udar timoroan senti orgullu tebes", nia afirma.

Filomeno de Andrade aponta mós katak folin hosi perfurasaun tolu - iha Karau (metru 1.400), Kumbili (metru 1.600) ho Laisapi (metru 1.799) - sei besik dolar millaun 55, asumi tomak hosi TR.

Perfurasaun ida-idak sei demora fulan rua no sei halo ho dalan susesivu, hafoin ne'e maka halo furu hosi avaliasaun (liutiha fulan neen) hodi konfirma dimensaun ne'ebé kalkuladu hosi lensol.

Rekorda katak Governu timoroan fó ona iha fulan-Abril tinan 2017 ba TR lisensa dahuluk sira esplorasaun no produsaun petróleu nian iha interior nasaun, abranje área ida besik rihun rua kilómetru kuadradu iha munisípiu haat hosi súl nasaun nian.

Bloku A - iha munisípiu sira Covalima ho Maliana - no Bloku C - iha munisípiu sira Manufahi ho Ainaro - adjudika ona, iha rejimi hosi Kontratu sira Partilla hosi Produsaun (PSC) nian, ba Timor Resources Pty Ltd, empreza australianu ida ne'ebé halo parte hosi Nepean Group.

Responsável esplika ona katak empreza investe ona dolar millaun 18 resin iha projetu sira, valor ida ne'ebé la'ós hanesan dimensaun boot bainhira kompara ho empreza inan, Nepean, "empreza australianu boot ne'ebé fornese ekipamentu sira mina nian no ne'ebé bele sai hanesan empreza boot ida iha mundu" hafoin sosa tiha empreza europeia Sanvic iha tinan 2018.

Aposta ida hosi empreza familiar ida ne'ebé, "agora iha Timor la'ós de'it tanba petróleu ho gás maibé mós hodi apoia nasaun hodi hanoin iha populasaun".

Reseita sira sei fahe 50-50 ho Timor Gap no lukru kalkuladu hosi TR maka hosi "8% resin" hosi reseita sira.

Lusa

 


Comentários

Critério de publicação de comentários