Pájina aktualizada iha 22:38h, domingu 17 Novembru

Guiné-Bissau: Brazil hatudu apoiu ba primeiru-ministru Aristides Gomes

06 de Novembro de 2019, 22:50

Iha loron-tersa ne'e Governu brazileiru hatudu apoiu ba primeiru-ministru Aristides Gomes, ne'ebé demiti ona hosi Prezidente guiniense, no hatete katak hein atu eleisaun prezidensial sira sei halo iha 24 Novembru, haktuir hosi nota ida ne'ebé fó sai hosi Ministériu Relasaun Exterior sira.


"Governu brazileiru akompaña dezenvolvimentu polítiku foun sira iha Guiné-Bissau, nasaun ne'ebé mantén relasaun istóriku sira ho tradisional sira no iha projetu sira koperasaun ne'ebé importante, iha espetativa atu ator polítiku sira hotu kontribui ba realizasaun hosi eleisaun sira iha loron 24 Novembru, importante ba konsolidasaun hosi dame ho estabilidade iha nasaun ne'e", hakerek iha nota ne'ebé fó sai iha loron-segunda.

"Brazil hatudu nia apoiu ba Governu Guiné-Bissau, ne'ebé xefia hosi primeiru-ministru Aristides Gomes, no repete fali nia intensaun hodi kopera, iha nível bilateral no hamutuk ho parseiru internasional sira, hanesan ho Komunidade hosi Nasaun sira Lian Portugeza (CPLP) nian, ba konsolidasaun hosi nia demokrasia ho nia dezenvolvimentu", hatutan.

Guiné-Bissau hasoru daudaun momentu ida ho tensaun polítika maka'as: nasaun agora daudaun iha governu rua ho primeiru-ministru na'in rua, maka hanesan Aristides Gomes ho Faustino Imbali.

Prezidente guiniense fó pose iha loron 31 Outubru ba Governu foun ida hafoin demiti tiha ezekutivu ne'ebé lidera hosi Aristides Gomes iha loron 28 Outubru no afirma ona iha loron-domingu katak nia desizaun hanesan "labele muda".

Uniaun Afrikanu, Uniaun Europeia, Komunidade Ekonómiku hosi Estadu sira Áfrika Osidental nian (CEDEAO), CPLP ho ONU kondena ona desizaun hosi Prezidente José Mário Vaz no hatete ona katak rekoñese de'it Governu ne'ebé harii hosi eleisaun lejislativu sira loron 10 Marsu liubá ne'ebé maka sei hala'o hela funsaun sira.

Aristides Gomes nia Governu hatete ona katak la rekoñese desizaun hosi José Mário Vaz, tanba hanesan kandidatu ba eleisaun prezidensial sira, tanba nia mandatu hotu ona iha loron 23 Juñu liubá - liutiha tinan lima hafoin simu pode nu'udar xefe Estadu - no tanba kaer kargu to'o agora tanba desizaun hosi CEDEAO.

Misaun ida CEDEAO nian, ne'ebé to'o iha nasaun iha loron-sábadu, reforsa ona iha loron-domingu katak organizasaun apoia Governu hosi Aristides Gomes no ameasa fali atu halo kastigu sira ba ema ruma ne'ebé hamosu obstákulu sira ba realizasaun hosi prezidensial sira iha loron 24 Novembru.

Iha loron-segunda, Konsellu Seguransa hosi ONU ameasa ona ho kastigu foun sira ba ema sira ne'ebé maka "estraga estabilidade" iha Guiné-Bissau.

Prezidente konvoka ona reuniaun ida hosi Konsellu Superior Defeza nian maibé la fó sai konkluzaun sira hosi enkontru.

Lusa

 


Comentários

Critério de publicação de comentários