Pájina aktualizada iha 22:38h, domingu 17 Novembru

PM Aristides Gomes justifika reforsu seguransa ho ameasa sira hasoru forsa polisial

07 de Novembro de 2019, 00:42

Primeiru-ministru Aristides Gomes justifika ona, iha loron-kuarta ne'e, reforsu seguransa iha Palásiu Governu, iha Bissau, kapital guiniense, ho "ameasa sira ne'ebé halo" hasoru forsa polisial sira.


"Ohin dadeer, tanba ameasa sira ne'ebé halo hasoru Komisáriu Nasional Polísia ho Ordem nian no Komandante Jeral hosi Guarda Nasional iha reuniaun hosi Konsellu Superior Defeza Nasional nian hodi kumpri pretensu dekretu prezidensial rua hosi kandidatu ba eleisaun sira, Dr. José Mário Vaz, ne'ebé hakarak demiti Governu lejítimu Guiné-Bissau nian, ami fó instrusaun hodi aumenta forsa seguransa iha instituisaun governamental tomak, liuliu iha Palásiu Governu, hanesan medida prekausaun nian", refere hosi primeiru-ministru Aristides Gomes.

Iha mensajen ida ne'ebé publika iha nia pájina ofisial iha Facebook, primeiru-ministru, ne'ebé prezidi hela reuniaun estraordináriu ida hosi Konsellu Ministru hodi debate komunikadu hosi Konsellu Superior Defeza Nasional nian, apela mós ba populasaun hodi mantén "kalma ho serenidade".

Iha loron-kuarta dadeer, bele haree reforsu seguransa nian iha Palásiu Governu ne'ebé funsionáriu sira hetan bandu hodi tama.

Konsellu Superior Defeza Nasional nian rekomenda ona ba Prezidente guiniense, José Mário Vaz, hodi prepara "forsa konjuntu" hodi fasilita entrada hosi membru sira hosi Governu Faustino Imbali nian iha departamentu governamental sira, anunsia hosi Prezidénsia Repúblika guiniense iha loron-kuarta ne'e liuhosi komunikadu.

Komunikadu fó sai iha sekuénsia hosi reuniaun sira ne'ebé hala'o hosi órgaun ne'e iha loron-segunda ho loron-tersa loraik.

Guiné-Bissau hasoru daudaun momentu ida ho tensaun polítika maka'as: nasaun agora daudaun iha governu rua ho primeiru-ministru na'in rua, maka hanesan Aristides Gomes ho Faustino Imbali.

Prezidente guiniense fó pose iha loron 31 Outubru ba Governu foun ida hafoin demiti tiha ezekutivu ne'ebé lidera hosi Aristides Gomes iha loron 28 Outubru no afirma ona iha loron-domingu katak nia desizaun hanesan "labele muda".

Uniaun Afrikanu, Uniaun Europeia, Komunidade Ekonómiku hosi Estadu sira Áfrika Osidental nian (CEDEAO), CPLP ho ONU kondena ona desizaun hosi Prezidente José Mário Vaz no hatete ona katak rekoñese de'it Governu ne'ebé harii hosi eleisaun lejislativu sira loron 10 Marsu liubá ne'ebé maka sei hala'o hela funsaun sira.

Aristides Gomes nia Governu hatete ona katak la rekoñese desizaun hosi José Mário Vaz, tanba hanesan kandidatu ba eleisaun prezidensial sira, tanba nia mandatu hotu ona iha loron 23 Juñu liubá no tanba kaer kargu to'o agora tanba desizaun hosi CEDEAO.

Misaun ida CEDEAO nian, ne'ebé to'o iha nasaun iha loron-sábadu, reforsa ona iha loron-domingu katak organizasaun apoia Governu hosi Aristides Gomes no ameasa fali atu halo kastigu sira ba ema ruma ne'ebé hamosu obstákulu sira ba realizasaun hosi prezidensial sira iha loron 24 Novembru.

Iha loron-segunda, Konsellu Seguransa hosi ONU ameasa ona ho kastigu foun sira ba ema sira ne'ebé maka "estraga estabilidade" iha Guiné-Bissau.

Guiné-Bissau halo eleisaun prezidensial sira iha loron 24 Novembru. Kampaña eleitoral, ne'ebé sei partisipa kandidatu na'in 12 ne'ebé aprova hosi Supremu Tribunal Justisa, hahú iha loron-sábadu ho hotu iha loron 22 Novembru.

Lusa

 


Comentários

Critério de publicação de comentários