Pájina aktualizada iha 22:38h, domingu 17 Novembru

Prezidente foun ba enklave Oecusse nian hakarak atrai investimentu ba rejiaun

08 de Novembro de 2019, 00:04

Prezidente foun hosi Rejiaun Administrativu Espesial hosi Oecusse-Ambeno (RAEOA), José Luis Guterres, hatete iha loron-kinta ne'e katak hakarak kontinua serbisu ne'ebé halo iha rejiaun, buka atrai tan investimentu sira ba enklave.


"Maski iha diferensa polítika ruma, iha orsamentu ida ne'ebé maka implementa ona iha Oecusse no obra sira koñese ona", nia afirma iha deklarasaun sira ba Lusa.

"Hosi ha'u nia parte ha'u apresia saida maka halo ona, no saida maka ha'u tenki halo maka kontinua asaun ne'ebé maka halo ona no hetan dalan foun sira hodi atrai investimentu sira ba Oecusse", nia subliña maibé la hatete kona-ba prioridade sira to'o momentu nia simu funsaun sira ho nia ekipa sira simu pose.

José Luis Guterres nomeadu iha loron-kuarta, iha rezolusaun ida ne'ebé aprova iha reuniaun iha loron-kinta ne'e iha Konsellu Ministru, haktuir hosi komunikadu ida iha pájina hosi primeiru-ministru Taur Matan Ruak nian.

"Ha'u hakarak ko'alia kestaun ne'e [hosi prioridade sira] hafoin simu pose no hosi reuniaun ho ekipa ne'ebé sei serbisu", nia konsidera.

"Ha'u lakohi personaliza jestaun Oecusse nian. Ohin loron jestaun moderna hanesan jestaun ekipa ida nian. Ha'u hakarak atu susesu ba ekipa tomak no liuliu ba povu Oecusse nian", nia hatete.

Antigu xefe diplomasia hatete ona ba Lusa katak nia hatene desizaun hosi primeiru-ministru iha inísiu semana ne'e, bainhira Taur Matan Ruak konvida nia ba enkontru ida iha Palásiu Governu hodi halo proposta ba nia.

"Ha'u hanesan kombatente no tanba ne'e labele husik dezafiu sira, susar sira hodi bele simu ha'u iha fatin ida ne'ebé konfortável liu, ho benefísiu pesoal sira no la aseita dezafiu ne'e, susar sira ne'e. Tanba ne'e maka ha'u hatete katak ha'u iha disponibilidade", nia afirma.

Guterres, koñesidu hanesan "Lugo", halo mós parte hosi lista ida hosi embaixador sira ne'ebé hein simu pose, iha kazu hodi lidera misaun diplomátiku iha Jenebra.

"Lalais hatete katak iha nível pesoal sira nia hakarak iha fatin ida ne'ebé konfortável liu, ne'ebé hanesan Jenebra, no iha serbisu ida ne'ebé ha'u hatene di'ak. Maibé ha'u hatete sim [ba Oecusse], tanba situasaun nasaun nian ho responsabilidade istóriku sira ne'ebé ha'u iha ba nasaun", nia afirma.

"Ita nia moris iha momentu sira ne'ebé ita tenki desidi atu hili dalan susar ne'ebé benéfiku ba ita nia aan rasik ka hili situasaun susar liu, ho dezafiu boot liu maibé ne'ebé bele fó benefísiu ba ema barak.

Guterres afirma ona katak serbisu iha rejiaun sei halo hamutuk ho Governu nasional ho populasaun enklave nian, liuliu formadu sira ne'ebé joven liu.

"Iha ema barak maka matenek liu duké ha'u, jestor di'ak liu duké ha'u, karik iha liu esperiénsia. Ha'u rekoñese ne'e", nia afirma.

"Klaru joven barak hosi Oecusse forma daudaun iha universidade sira iha estranjeiru. No hanesan halibur matenek, koñesimentu ho esperiénsia ne'e, ho apoiu hosi povu Oecusse no nia estrutura tradisional sira maka ami bele muda Oecusse hodi nune'e povu bele iha moris di'ak ida", nia afirma.

Governu seidauk fó sai loron fó pose ba José Luis Guterres.

Lusa

 


Comentários

Critério de publicação de comentários