Pájina aktualizada iha 22:38h, domingu 17 Novembru

Mari Alkatiri hatete katak istória sei avalia nia asaun iha lideransa hosi enklave Oecusse nian

08 de Novembro de 2019, 00:32

Eis-prezidente hosi Rejiaun Administrativu Espesial Oecusse-Ambeno (RAEOA), Mari Alkatiri, hatete iha loron-kinta ne'e katak istória sei avalia nia papel iha dezenvolvimentu hosi enklave timoroan no ne'ebé maka nia jestaun husik ona iha rejiaun.


"Ha'u husik ona saida maka ha'u husik. Rezultadu sira iha ne'ebá. Agora istória maka sei halo justisa", afirma hosi sekretáriu-jeral Fretilin, iha opozisaun Timor-Leste nian, iha deklarasaun sira ba Lusa.

Alkatiri komenta nune'e desizaun hosi Governu hodi nomeia José Luis Guterres, eis-visi-primeiru-ministru ho eis-ministru Negósiu Estranjeiru, hodi prezidi RAEOA.

"Ha'u hein atu Governu iha kapasidade hodi hili ema ida ne'ebé di'ak liu ha'u. Maibé... istória maka sei hatudu", nia afirma maibé lakohi halo tan komentáriu kona-ba eskolla.

Guterres, ne'ebé maka hili ona hosi Governu hanesan embaixador timoroan nian ba Jenebra, hanesan dirijente hosi Frente Mudansa (FM), partidu ne'ebé maka moris hosi konflitu ida hosi Frente Revolucionária do Timor-Leste Independente (Fretilin) no ne'ebé halo ona kampaña ho koligasaun Governu nian iha eleisaun sira ikus ne'e.

Rekorda katak autoridade rejional lidera hela interinamente hosi Arsénio Bano, eis-númeru rua hosi Alkatiri ne'ebé hakotu nia mandatu iha loron 31 Jullu.

"La'ós hanesan ha'u nia susesor. Ha'u husik ona Oecusse durante fulan tolu ona", Alkatiri afirma.

Kestaun hosi lideransa autoridade nian hetan nafatin polémika dezde promesa eleitoral ida hosi atual primeiru-ministru, Taur Matan Ruak, hodi hadook Alkatiri hosi kargu bainhira koligasaun hosi ezekutivu - Aliansa Mudansa ba Progresu (AMP) - manán eleisaun sira.

Promesa ne'e ikusmai la kumpri ida - Alkatiri hakotu nia mandatu durante tinan haat - maibé polémika mantén tanba Governu desidi muda lejislasaun kona-ba nomeasaun hosi prezidente RAEOA nian, antes final mandatu nian.

Iha konkretu, hamutuk ho mudansa sira seluk, bankada sira Governu nian iha parlamentu hasai ona xefe Estadu - Francisco Guterres Lu-Olo, ne'ebé hanesan mós prezidente Fretilin nian - hosi prosesu hosi nomeasaun ba responsável rejional nian.

Xefe Estadu ikusmai husu fiskalizasaun preventivu ba diploma - ho Tribunal Rekursu konsidera katak mudansa sira la hanesan inkonstitusional - nune'e ikusmai Prezidente promulga testu ne'e.

Iha loron 19 Jullu, Alkatiri hakotu definitivu funsaun sira iha final fulan ne'ebá, la haksolok ho mudansa ba lei hosi kriasaun rejiaun nian.

Mudansa, nia hakerek iha karta ida ba primeiru-ministru, "(...) reflete konseitu polítiku ida ne'ebé ha'u labele konkorda no ne'ebé hanesan inevitavelmente ha'u sei hadook aan, hodi respeita ba ha'u nia integridade ho prinsípiu pesoal sira".

Governu seidauk fó sai loron hodi fó pose ba José Luis Guterres.

Lusa

 


Comentários

Critério de publicação de comentários