Pájina aktualizada iha 12:33h, tersa-feira 10 Dezembru

Prezidente Repúblika kondekora jornalista Max Stahl no husu atu bele fó nasionalidade ba nia

22 de Novembro de 2019, 23:39

Iha loron-sesta ne'e, Prezidente Repúblika kondekora ona jornalista britániku Max Stahl, destaka nia nobreza ho korajen hodi defende direitu ba autodeterminasaun, no defende ona atu bele fó sidadania Timor-Leste ba nia.


"Ema ne'ebé, ho nobreza maka'as, ariska ona nia moris iha oras susar sira no ne'ebé entrega aan tomak ba ita nia nasaun, hetan ona direitu hodi sai hanesan sidadaun timoroan", afirma hosi Francisco Guterres Lu-Olo.

"Ita nia irmaun Max Stahl sai ona ema timoroan hanesan ita. Ha'u husu ba Parlamentu Nasional hodi fó atensaun ba kazu ne'e tanba kestaun ida liu hanesan kestaun elementar justisa nian", nia hatete.

Lu-Olo ko'alia hafoin kondekora tiha Max Stahl - jornalista ne'ebé filma ona masakre Santa Cruz iha loron 12 Novembru 1991 - ho Kolar hosi Orden Liberdade nian, galardaun ne'ebé aas liu ne'ebé maka bele fó ba sidadaun ida.

"Max Stahl nia imajen sira kontribui maka'as hodi muda atitude sira ho ajuda komunidade internasional entende katak, manifestasaun lahó tauk hosi joven sira, hatudu mós hakarak profundu hosi povu ida ne'ebé iha luta, hosi povu ida ne'ebé maski iha aten-barani ho indomável, hatene organiza no luta ho lema 'Rezisti maka mana'an'", hatete hosi Prezidente.

Dekretu hosi kondekorasaun rekorda Max Stahl nia knaar, ne'ebé fó ona vizibilidade hosi operasaun indonéziu nian iha Timor-Leste, hodi rekolla imajen sira hosi masakre Santa Cruz nian "ne'ebé influensia maka'as ona opiniaun públika internasional" kona-ba situasaun iha teritóriu.

"Influénsia iha pensamentu hosi komunidade internasional hodi konkorda ho ita nia luta akontese tanba filmajen hosi masakre iha Santa Cruz", refere hosi dekretu.

"Max Stahl hatudu ona nia korajen maski iha situasaun hosi opresaun iha momentu ne'ebá. Masakre Santa Cruz konsidera ona hanesan pontu ida mudansa nian iha ita nia luta ba libertasaun hosi pátria ne'ebé okupadu", hatutan mós.

Hatudu "emosaun maka'as", xefe Estadu esplika ona katak kondekorasaun rekoñese "buat hotu ne'ebé belun ne'e halo ona to'o ohin loron ba nasaun ne'e no ba povu ne'ebé nia ajuda ona hodi liberta hosi dominasaun estranjeiru ne'ebé ladi'ak".

Lu-Olo rekorda ona ema sira ne'ebé "luta ho aten-barani no, ho determinasaun ba Timor-Leste, movidu ho dever hodi serbi nasaun ho povu".

Christopher Wenner, ne'ebé hahú ona koñesidu ho naran Max Stahl, hahú nia ligasaun ho Timor-Leste iha loron 30 Agostu 1991 bainhira, "bosok sai hanesan turista" tama iha teritóriu hodi filma dokumentáriu ida ba televizaun independente ingleza ida.

Nia entrevista ona líder rezisténsia oioin no, hafoin sai tanba vistu, nia fila fali ba rai ne'e, no ikusmai iha loron 12 Novembru iha tinan hanesan filma masakre Santa Cruz.

"Importante maka iha hanoin hikas iha ne'e nia korajen maka'as hodi filma iha loron ida ne'ebé akontese krueldade maka'as hasoru joven sira ne'ebé laiha defeza", Lu-Olo hanoin hikas.

"Hafoin interogatóriu ida durante oras sia ka sanulu iha eskuadra polísia Comoro nian, Max fila iha kalan hanesan ba semitériu Santa Cruz, ariska dala ida tan nia moris rasik, hodi hasai kasete sira ne'ebé nia rai iha rate foun ida", nia hatete.

Material ne'ebé nia rekupera ikusmai lori sai hosi nasaun hosi holandeza Saskia Kowenberg - ne'ebé sei simu galardaun ida iha loron 28 Novembru oinmai, ho imajen sira ne'ebé iha loron sira tuirmai fó sai ba mundu tomak.

Prezidente rekorda katak, dezde independénsia, Max Stahl dezenvolve nafatin projetu boot ida hodi harii iha Timor-Leste arkivu audiovizual ida ne'ebé sei ajuda husik rejistu sira luta nian hasoru okupasaun ba jerasaun sira tuirmai.

"Max Stahl hatudu ona dezempeñu korajozu ida iha perkursu hosi ita nia luta. Iha époka hafoin okupasaun, Sr. Max Stahl kontribui nafatin ba dezenvolvimentu Timor-Leste nian, entre asaun sira seluk, liuhosi organizasaun ida ne'ebé hanaran Sentru Audiovizual Max Stahl ne'ebé nia atividade sira iha ligasaun ba prezervasaun, divulgasaun ho dezenvolvimentu hosi arkivu sira hosi memória istóriku nian. Kontributu sira ne'ebé hatudu hosi jornalista korajozu no repórter hosi funu ne'ebé tenki hetan rekoñesimentu ho valorizadu.

Xefe Estadu hatete katak istória hatudu katak "ema timoroan sira la mesak durante tinan sira luta nian" ho apoiu hosi sidadaun sira hosi nasaun oioin.

"Max Stahl mai hodi filma, maibé entrega isin ho klamar tomak ba ita doben Timor-Leste livre ho independente. Ohin loron hela iha Timor-Leste ho família no kontribui, lahó limiti, hodi aumenta nível profisional hosi ita nia repórter sira", nia afirma.

"Iha tinan 28 liubá maka hamutuk ho ita nia hanoin sira ho serbisu hamutuk ho ita iha oras susar no oras di'ak sira! Fahe hamutuk ho ita vitória ho falla sira, ita nia emosaun sira, ita nia preokupasaun sira no ita nia esperansa sira iha nasaun ida ne'ebé iha estadu konsolidasaun nian".

Stahl, ne'ebé tenki sai temporáriu hosi Timor-Leste hodi halo tratamentu médiku, hetan ona galardaun Orden Timor-Leste nian iha tinan 2009 ho grau Insígnia nian.

Lusa

 


Comentários

Critério de publicação de comentários