Pájina aktualizada iha 12:23h, tersa-feira 10 Dezembru

Sekretáriu-Jeral UDT nian simu knaar deputadu nian iha parlamentu

02 de Dezembro de 2019, 22:14

Sekretáriu-jeral hosi União Democrática Timorense (UDT), Francisco David Xavier Carlos, asumi iha loron-segunda ne'e knaar sira deputadu nian iha Parlamentu Nasional, hodi troka eis-prezidente Gilman dos Santos, ne'ebé maka mate ona iha fulan liubá.


Francisco Carlos simu ona knaar sira iha inísiu hosi sesaun plenáriu loron-segunda dadeer, ne'ebé marka mós ho inísiu hosi debate iha jeneralidade ba proposta hosi Orsamentu Jeral Estadu (OJE) nian.

Gilman dos Santos,ho tinan 63, iis kotu iha loron 26 Novembru iha Hospital Nacional Guido Valadares, bainhira la senti di'ak iha uma.

Iha loron-kuarta liubá, loron funeral nian, halo ona sesaun solene ida iha Parlamentu hodi fó homenajen ba deputadu Gilman dos Santos.

Gilman Exposto dos Santos ne'ebé moris iha loron 04 Jullu 1956 iha Fatubessi, Ermera, lakon ona nia irmaun ho aman iha funu sivil tinan 1975 kontra Fretilin.

Durante okupasaun indonéziu nian iha Timor-Leste sai ona funsionáriu Governu nian, entre 1977 to'o 1979, no entre tinan 1987 ho 2012 iha ligasaun ho ETADEP (Fundasaun ba Projetu Agrikultura ho Dezenvolvimentu Timor-Leste nian).

Xanana Gusmão nia kuñadu, Gilman dos Santos, ho nia feen Armandina ho nia oan na'in rua hetan prezu liutiha tempu balun hafoin kaer líder istóriku timoroan nian iha tinan 1992. Santos iha momentu ne'ebá hanesan membru hosi organizasaun ida hosi ajuda katólika nian no nia feen nu'udar sekretária partikular hosi governador indonéziu Mário Viegas Carrascalão.

Hafoin independénsia, no entre kargu sira seluk, Santos sai nu'udar ko-fundador hosi Akademia Café Timor-Leste nian.

Nia oan-mane ida, Nilton Gusmão, hanesan emprezáriu timoroan ida ho susesu maka'as, ho investimentu iha área oioin atividade nian.

Santos sai nu'udar prezidente UDT nian dezde Fevereiru 2010, hodi troka João Viegas Carrascalão.

UDT, partidu polítiku dahuluk ne'ebé maka harii iha Timor-Leste, iha loron 11 Maiu 1974 - la konsege hili deputadu ida iha eleisaun sira tinan 2012 ho 2017.

Iha lejislativu antesipadu tinan 2018, UDT hamutuk ho partidu sira seluk iha koligasaun ida ne'ebé konsege hetan ona mandatu tolu iha parlamentu.

Lusa

 


Comentários

Critério de publicação de comentários