Pájina aktualizada iha 12:33h, tersa-feira 10 Dezembru

Primeiru-ministru haree agresividade maka'as hosi bankada sira Governu nian kona-ba proposta OJE

03 de Dezembro de 2019, 20:59

Iha loron-tersa ne'e, primeiru-ministru hatete ona katak, ba dala uluk, maka deputadu sira hosi koligasaun Governu nian maka hatudu liu krítika sira ho "agresivu" kona-ba proposta hosi Orsamentu Jeral Estadu (OJE) nian ba tinan 2020.


"Hanesan diferensa boot ida. Baibain bainhira diskuti OJE, bankada sira ne'ebé sustenta Governu defende proposta hosi Governu ho opozisaun kritika", Taur Matan Ruak hatete iha intervensaun ida iha parlamentu.

"Maibé agora, hanesan deputadu sira rasik ne'ebé halo parte iha Governu maka hatudu agresivu. Karik tanba hanesan oportunidade hodi fortalese demokrasia", nia afirma.

Taur Matan Ruak ko'alia iha Parlamentu Nasional iha loron daruak hosi loron tolu ba debate iha jeneralidade hosi proposta OJE nian ba tinan 2020, dokumentu ne'ebé hetan beibeik protestu tanba nia valor ho elementu sira hosi konteúdu nian.

Primeiru-ministru insisti katak OJE iha "uma parlamentar" no la depende ba nia desizaun ne'ebé maka parlamentu sei foti, "Governu sei kopera ho kolabora" tanba "importante liu maka aprova orsamentu ida hodi fó benefísiu ba sidadaun sira".

"Mudansa iha povu nia kondisaun moris maka tenki akontese", nia destaka.

Taur Matan Ruak refere ona ba esforsu sira, hahú iha Governu daneen, hodi "avansa iha modelu hosi orsamentasaun ho baze iha programa sira", asaun ne'ebé implika "planeamentu, programasaun, orsamentasaun, ezekusaun, kontrolu ho avaliasaun".

Nia hatete katak iha kuadru ne'e, Parlamentu maka "kaer kontrolu hosi atividade sira governasaun nian" no Governu avansa iha "mudansa estruturante sira hodi ajuda iha implementasaun" ho modelu foun ida.

Iha reasaun ida ba krítika sira hosi jestaun ladi'ak ho korupsaun, Taur Matan Ruak hatete katak programa Governu nian iha baze hodi hasoru ho matéria sira ne'e, avansa iha aprovizionamentu eletróniku, aumenta nune'e transparénsia hosi prosesu.

"Ha'u rejista imi nia preokupasaun tomak, dezafiu sira ho problema sira ne'ebé maka imi hato'o. Hanesan lisaun hodi nune'e ami bele hadi'a governasaun", nia adianta.

"Ita aprende nafatin. Ita tenki kontinua adapta ba evolusaun ne'ebé akontese nafatin iha mundu modernu. Espíritu hosi ita nia luta [ba independénsia] maka hodi ita adapta nafatin ba dezafiu sira luta nian. Ita tenki halo hanesan mós ba tempu agora nian", nia hatete.

Debate ne'e interompe ba almosu no kontinua iha loraik.

Lusa

 


Comentários

Critério de publicação de comentários