Pájina aktualizada iha 02:25h, sabado 12 Jullu

Prezidente polaku bele boikota serimónia kona-ba Holokausto iha Israel

07 de Janeiro de 2020, 23:16

Eventual boikot hosi prezidente Polónia nian ba serimónia iha Israel iha tinan 75 hosi libertasaun hosi kampu nazi Auschwitz nian, bainhira labele ko'alia antes ka depois prezidente Rúsia nian, hetan daudaun diskusaun iha loron-tersa ne'e iha Varsóvia.


Andrzej Duda konvoka ona iha loron-tersa ne'e reuniaun ida hodi ko'alia kona-ba nia partisipasaun iha eventu, nune'e mós situasaun iha Médiu Oriente hafoin asasíniu hosi prinsipal jeneral Iraun nian ne'ebé maka halo hosi Estadus Unidus.

Visi-ministru Negósiu Estranjeiru polaku nian, Pawel Jablonski, hatete iha loron-tersa ne'e katak hanesan "labele admiti" katak Duda laiha autorizasaun hodi ko'alia durante Fórum Mundial Holokausto nian, ne'ebé maka hala'o entre 22 ho 23 Janeiru iha Yad Vashem iha Jeruzalén.

Vladimir Putin, konvida hosi prezidente israelita, Reuven Rivlin, hanesan orador prinsipal.

Polónia senti preokupadu tebes ho deklarasaun foun sira hosi Putin ne'ebé maka fó kulpa ruma ba Varsóvia tanba inísiu hosi Funu Mundial Daruak nian.

Bosok maka'as haktuir hosi primeiru-ministru polaku, Mateusz Morawiecki.

Polónia sai hanesan vítima dahuluk hosi Funu Mundial Daruak, no hetan atake iha fulan-Setembru tinan 1939 hosi tropa sira Alemaña nazi nian no hosi Uniaun Soviétika.

Iha serimónia ida iha Israel sei partisipa mós prezidente sira hosi Fransa, Alemaña, Itália ho Áustria.

Polónia sei asinala aniversáriu hosi libertasaun Auschwitz hosi Ezérsitu Mean iha loron 27 Janeiru iha fatin hosi kampu extermíniu nazi nian ne'ebé jere hosi ema alemaun sira iha teritóriu polaku okupadu.

Ema millaun ida resin mate ona iha Auschwitz, maioria hanesan ema judeu europeu sira maibé mós ema polaku sira, ema siganu sira no prizioneiru sira hosi funu rusu sira nian.

Lusa

 


Comentários

Critério de publicação de comentários