Pájina aktualizada iha 23:41h, segunda-feira 25 Maiu

Ema venezuelanu rihun tolu resin hela iha prédiu mamuk sira iha sidade brazileiru Boa Vista

09 de Janeiro de 2020, 01:09

Númeru hosi ema venezuelanu sira ne'ebé maka hela iha prédiu mamuk sira iha sidade brazileiru Boa Vista, iha estadu Roraima, aumenta ba na'in 3.100, haktuir hosi Operasaun Acolhida, programa hosi Governu Brazil nian ba migrante sira hosi nasaun viziñu.


Iha loron-segunda liubá, grupu serbisu ida ne'ebé harii hosi titular sira hosi sekretaria estadual sira Roraima nian, komandante sira Polísia nian ho Bombeiru Militar sira, aleinde kordenador sira hosi Defeza Sivil, membru sira hosi Operasaun Acolhida no reprezentante sira hosi Komisariadu Aas hosi ONU nian ba Refujiadu (UNHCR) hasoru malu hodi ko'alia kona-ba okupasaun espontáneu hosi prédiu públiku sira ne'ebé halo hosi ema venezuelanu sira.

"Durante enkontru, aprezenta ona kuantitativu hosi ema na'in 3.100 iha okupasaun espontáneu hamutuk 11, inklui prédiu públiku sira ho partikular sira iha bairu oioin iha Boa Vista, katalogadu ho monitorizadu hosi grupu humanitáriu ne'ebé loron-loron vizita fatin sira ne'e", informa hosi Governu Roraima liuhosi komunikadu.

Hahú hosi tinan liubá maka akontese enkontru sira ho membru sira hosi Operasaun Acolhida no órgaun sira ne'ebé partisipa iha prosesu hosi ajuda humanitáriu ba refujiadu sira, hodi ko'alia desokupasaun hosi fatin públiku sira, hodi hala'o reforma sira estrutura sira nian, nune'e mós konstrusaun foun sira, iha tinan 2020 nia laran, hodi buka muda mós família venezuelanu sira iha fatin seluk.

"Ami sei hala'o ho dalan di'ak transferénsia hosi família sira ne'ebé ohin loron okupa fatin públiku sira, konta ho apoiu ho envolvimentu hosi sekretaria prinsipal sira Estadu nian iha prosesu ne'e, nune'e mós ho apoiu inkondisional hosi Operasaun Acolhida no parseria hosi ajénsia internasional sira hosi ajuda humanitáriu nian ba refujiadu sira", informa hosi Tânia Soares, membru hosi Sekretaria Traballu ho Moris Di'ak Sosial (Setrabes) Boa Vista nian.

Agora daudaun, estrutura mamuk ne'ebé iha kuantidade maka'as hosi ema sira maka prédiu antigu hosi Sekretaria Jestaun Estratéjiku ho Administrasaun nian, iha Roraima, ho okupante na'in 191 mane, feto na'in 181 no labarik na'in 196, hamutuk na'in 568.

Tuir prédiu mamuk seluk ne'ebé pertense ba estadu Roraima, ne'ebé uluk funsiona Sekretaria Edukasaun ho Desportu, ho okupante na'in 418, mane na'in 140, feto na'in 140 no labarik na'in 138.

Governu brazileiru, lidera hosi Jair Bolsonaro, akuza Nicolás Maduro hanesan responsável ba krizi iha Venezuela, marka ho falta síklika, hiperinflasaun ho populasaun barak sai hosi nasaun, ONU kalkula hamutuk ema millaun haat resin.

Tuir informasaun ofisial sira, ema venezuelanu na'in 220.000 resin agora daudaun tama iha Brazil no na'in 500 resin maka tama, loron-loron, iha nasaun ne'e, maioria hosi estadu Roraima.

Lusa

 


Comentários

Critério de publicação de comentários