Pájina aktualizada iha 21:31h, kinta-feira 23 Janeiru

Númeru hosi vítima mortal iha inséndiu sira iha Austrália aumenta ba na'in 27, estraga uma rihun rua resin

10 de Janeiro de 2020, 00:05

Númeru hosi vítima mortal sira iha inséndiu sira iha Austrália aumenta ona ba na'in 27, rejista mós uma hamutuk 2.131 maka hetan estraga, balansu ida ne'ebé bele sai aat ho avaliasaun sira iha zona sira ne'ebé afetadu liu, hatete hosi primeiru-ministru iha loron-kinta ne'e.


"Ami iha konfirmasaun hosi ema na'in 27 mate no uma hamutuk 2.131 maka hetan estraga, maibé ami kalkula katak ho avaliasaun sira hosi estraga sira, liuliu iha Victoria, númeru ne'e tristemente sei aumenta", afirma hosi Scott Morrison ba jornalista sira.

"Ita sei dook hodi sai hosi krizi ho dezastre ne'e", afirma hosi governante ne'ebé anunsia ona apoiu finanseiru diretu ba autarkia hamutuk 42.

Balansu anterior hatudu ba ema na'in 25 maka mate.

Scott Morrison ko'alia iha konferénsia imprensa iha Canberra hafoin reuniaun ida hosi Konsellu Ministru, ne'ebé domina hosi situasaun inséndiu nian no tensaun entre Estadus Unidus ho Iraun.

Morrison halo ona pontu situasaun operasional ida iha terenu, hodi subliña medida sira ne'ebé maka foti daudaun iha fatin oioin iha nasaun, ho envolvimentu hosi Forsa Defeza sira, servisu sira emerjénsia nian no governu lokal sira, estadual sira ho federal.

Nota katak risku klimatériku sei aumenta iha loron hirak tuirmai, Morrison esplika ona katak agora daudaun iha rezervista na'in 1.600 maka destaka iha parte oioin, iha ámbitu hosi operasaun Forsa Defeza Australianu (ADF) nian, ne'ebé mantén ró rua, HMAS Adelaide no HMAS Chules, iha súl ho sudeste nasaun nian.

"Ami iha ekipa sira ne'ebé serbisu hodi restabelese eletrisidade ba uma hamutuk rihun resin no negósiu sira. Barak maka laiha servisu. Ami fó mós apoiu emerjénsia iha zona sira ne'ebé afetadu liu, hodi buka hadi'a situasaun sira hosi infraestrutura sira", nia hatete.

Nia esplika katak ró sira ne'ebé destakadu bele apoia hodi hasai populasaun sira maibé ajuda ho operasaun oioin, ho helikópteru, ekipa médika sira ho enjeñaria ne'ebé bele halo intervensaun lalais.

Nia hatete katak Austrália hetan mós apoiu hosi efetivu sira hosi Estadus Unidus, Nova Zelándia ho Kanadá, no apoiu hosi nasaun oioin hosi "família Pasífiku nian".

"Iha ativu sira ne'ebé destakadu hanesan importante tebes. Hanesan ró sira ho kapasidade maka'as hodi fó asisténsia tomak ne'ebé maka presiza", nia hatete.

Hamutuk ho ADF, serbisu sira emerjénsia nian ho governu estadual sira aumenta hela rekursu humanu nian iha fatin oioin.

Nia hatete katak objetivu maka tenta tama ba komunidade balun ne'ebé sei kontinua izoladu, loke fali estrada sira ho permiti atu to'o apoiu adisional emerjénsia nian.

Hanesan parte hosi apoiu lalais, Morrison hatete katak Governu sei hahú fahe, hahú loron-sesta, pakote finanseiru sira hosi mínimu ida dolar millaun ida ba autarkia hamutuk 42.

"Hanesan asisténsia finanseiru imediatu ida ne'ebé sei tama iha konta aban [loron-sesta] no ne'ebé sei permiti ba autarkia sira hodi hatán lalais ba falta sira ne'ebé urjente liu", nia destaka.

Governu estuda hela medida sira seluk ba área sira hanesan turizmu, agrikultura ho empreza ki'ik sira ho empreza médiu sira.

"Apoiu sei aumenta tuir nesesidade sira. Ami hakarak rona responsável lokal sira hodi hatene oinsá maka ami bele ajuda", nia hatete.

"Sira presiza osan, la'ós burokrasia. No apoiu ida hanesan ne'e destina ba asaun ne'e, hodi fó apoiu finanseiru hodi [prenxe] falta iha terenu", nia afirma.

Lusa

 


Comentários

Critério de publicação de comentários