Pájina aktualizada iha 21:29h, kinta-feira 23 Janeiru

Kazu foun Ébola nian konfirma iha RDKongo hamosu tauk atu mosu fali epidemia ne'e

10 de Janeiro de 2020, 01:13

Kazu foun ida ne'ebé konfirma hosi infesaun vírus Ébola nian rejista iha loron-tersa, iha Beni, Repúblika Demokrátika Kongo (RDKongo), liutiha loron 29 nia laran lahó rejistu, hamosu tauk atu bele mosu fali epidemia ne'ebé halo ona ema na'in 2.235 mate.


Tuir boletin informativu foun liu hosi Komité Resposta ba Ébola, pasiente, mane ida ho tinan 40, hetan kontaktu ho ema infetadu ida no mate ona iha fulan-Dezembru.

Tuir autoridade sira saúde nian, "identifika ona pelumenus kontaktu hamutuk 108 relasionadu ho kazu ne'e, inklui membru na'in 14 hosi família hanesan".

Rejiaun saúde Beni nian "infetadu fali hahú hosi zona saúde Bundji, ne'ebé iha ema moras deslokadu sira no hein vasina kontra Ébola", hatutan hosi autoridade sira.

Ba Bibiche Matadi, hosi ekipa kontrolu Ébola nian iha Beni, situasaun ne'e iha orijen hosi emisaun alerta tarde sira no iha desinformasaun entre populasaun.

RDKongo hasoru epidemia ida Ébola nian ne'ebé maka deklara ona iha Agostu 2018 no agora daudaun afeta hela provínsia sira Kivu Norte ho Ituri.

Atividade sira hodi hatán hasoru moras hetan interompe beibeik tanba inseguransa ne'ebé mosu hosi violénsia iha área sira ne'ebé maka iha operasaun hosi grupu armadu sira.

Organizasaun la'ós governu nian, Médecins Sans Frontières, anunsia ona iha inísiu Dezembru atu hasai nia ekipa sira hosi rejiaun mina sira Biakato nian, ne'ebé funsionáriu na'in tolu mate ona iha atake armadu ida iha final Novembru nian.

Lusa

 


Comentários

Critério de publicação de comentários