Pájina aktualizada iha 21:29h, kinta-feira 23 Janeiru

Ema australianu rihun resin protesta no husu demisaun PM nian tanba inséndiu sira

10 de Janeiro de 2020, 22:00

Ema australianu millaun resin, iha loron-sesta ne'e, halo ona protestu iha sidade oioin iha nasaun hodi husu demisaun primeiru-ministru nian, Scott Morrison, tanba nia falta asaun relasiona ho inséndiu ai-laran sira no ba falta kompromisu ho klima.


"Ami halo protestu tanba inséndiu sira ne'e nunka akontese, ativu dezde fulan-Setembru no ami presiza asaun urjente hodi kombate no hodi luta hasoru mudansa klimátika sira", defende hosi Anneke De Manuel, organizadora ida hosi protestu, ba ajénsia Efe, protestu ne'ebé halo hosi grupu estudante universitáriu ekolojista sira ‘Students for Climate Justice’ no movimentu ‘Extinction Rebellion’.

Protestu hakarak hetan rezultadu hodi halo "tranzisaun lalais no 100% hosi kombustível fosil sira ba enerjia renovável sira no demisaun hosi ScoMo (alkuña ne'ebé maka fó ba primeiru-ministru Scott Morrison)”, subliña hosi Anneke De Manuel.

Inséndiu ai-laran sira ne'ebé akontese iha Austrália dezde fulan-Setembru liubá halo ona ema na'in 26 mate, estraga uma rihun rua resin no sunu ona área ida ne'ebé boot liu duké dobru hosi superfísie Béljika nian, kalkula katak oho ka husik lahó habitat animal selvajen biliaun resin.

Polísia Victoria nian, ne'ebé nia kapital maka Melbourne, admiti ona laiha efetivu sufisiente ba seguransa sidade nian tanba kuaze sira hotu uza iha kombate hasoru inséndiu ai-laran sira nian ne'ebé maka afeta liuliu sudeste nasaun nian.

Primeiru-ministru rekuza nafatin halo relasaun entre agravamentu hosi inséndiu sira ho krizi hosi klima, maski institutu australianu meteorolojia rasik konfirma ona ligasaun.

"Mudansa Klimátika sira influensia daudaun frekuénsia ho severidade hosi inséndiu sira iha Austrália no iha parte sira seluk iha mundu", refere hosi institutu.

Austrália hanesan esportador mundial boot anar nian no Morrison hanesan protagonista ida ne'ebé maka defende indústria ne'e.

Antes sai primeiru-ministru, Scott Morrison mosu iha parlamentu ho pedasuk ida hosi anal hanesan forma simbólika hodi defende empreza sira minerasaun nian iha momentu ne'ebé aumenta krítika sira no pedidu sira hodi hamenus extrasaun.

Manifestante sira ne'ebé halo protestu iha loron-sesta ne'e iha sidade oioin iha nasaun ezijimós atu kansela subsídiu sira ba indústria poluidor sira no aloka ba finansiamentu hosi bombeiru sira no kombate hasoru inséndiu sira, nune'e mós hodi ajuda komunidade sira ne'ebé afetadu hosi inséndiu sira.

Ba ema australianu barak, pontu dahuluk relasionadu ho primeiru-ministru akontese bainhira Scott Morrison rezolve halo férias iha Havai (Estadus Unidus) iha krizi inséndiu sira nia laran, situasaun ne'ebé maka halo nia tenki husu deskulpa públiku.

Lusa

 


Comentários

Critério de publicação de comentários