Pájina aktualizada iha 22:59h, segunda-feira 25 Maiu

Governu aprova limiti gastu ba janeiru iha inísiu hosi rejimi duodésimu nian

14 de Janeiro de 2020, 22:38

Iha loron-segunda ne'e, Governu aprova ona iha reuniaun estraordináriu ida hosi Konsellu Ministru nian limiti hosi gastu ne'ebé sei uza iha fulan-Janeiru iha ámbitu hosi rejimi duodésimu ne'ebé maka hala'o iha nasaun dezde loron 01 Janeiru.


Iha komunikadu, ezekutivu esplika katak rejimi duodésimu - ne'ebé sei iha limiti máximu hosi gastu hamutuk dolar millaun 116,4 - hanesan presiza tanba Orsamentu Jeral Estadu (OJE) ba tinan 2020 seidauk hetan aprovasaun.

Proposta hosi limiti gastu nian ba fulan-Janeiru aprezenta hosi ministra interina Finansa nian, Sara Lobo Brites, no debate hosi Governu iha enkontru estraordináriu iha loron-segunda ne'e.

Diploma hosi rejimi duodesimal "hamosu efeitu sira iha loron 01 Janeiru 2020 no taka automátiku hafoin hahú hala'o lei hosi Orsamentu Jeral Estadu nian ba tinan 2020", esplika hosi Governu.

Rekorda katak Governu aprova ona iha loron 19 Dezembru proposta foun ki'ik liu hosi OJE tinan 2020 nian, ne'ebé ko'a 14,46% hosi total despeza sira ne'ebé proposta antes, ba dolar millaun 1.668.

OJE 2020 nian - ne'ebé agora daudaun debate hela iha komisaun espesializadu sira Parlamentu Nasional nian - prepara ona ho baze iha prinsípiu fundamental lima, inklui "sustentabilidade fiskal iha prazu médiu ho prazu naruk no aliñamentu ho prioridade nasional sira".

Konsidera mós "kapasidade hosi ezekusaun orsamental, kapasidade absorsaun hosi ekonomia lokal ho kualidade orsamentu nian".

Proposta, ne'ebé maka Lusa iha asesu, kalkula ko'a iha kuaze kategoria tomak hosi gastu sira - saláriu sira ho vensimentu sira, sasán ho serbisu sira, transferénsia públika ho kapital menor - aumenta de'it iha kapital dezenvolvimentu nian.

Maski nune'e, folin hosi kapital dezenvolvimentu nian hetan diminuisaun iha kuaze ministériu tomak, aumenta iha nível global tanba de'it inkluzaun hosi dolar millaun 100 resin iha kategoria ne'e iha projetu sira iha Rejiaun Administrativu Espesial Oecusse-Ambeno (RAEOA).

Testu substitui proposta dahuluk ne'ebé Governu aprezenta, ho folin total ida hosi dolar biliaun 1,95, no ne'ebé primeiru-ministru hasai durante debate iha jeneralidade hafoin protestu parlamentar maka'as, inklui hosi bankada sira Governu nian

Proposta kalkula levantamentu ida aas liu hosi Rendimentu Sustentável Estimadu hosi Fundu Petrolíferu ne'ebé hanesan 50,46% ki'ik liu duké proposta dahuluk, iha total hosi dolar millaun 460,6.

Iha nível global, testu hosi proposta kalkula reseita total hosi dolar millaun 1765,2, ho reseita la'ós petrolíferu hosi dolar millaun 433,97, folin ne'ebé inklui dolar millaun 223,47 koresponde ba saldu iha konta hosi RAEOA.

Lusa

 


Comentários

Critério de publicação de comentários