Pájina aktualizada iha 15:13h, sabado 29 Fevereiru

Eleisaun antesipadu laiha interese ba ema ida iha Timor-Leste, afirma hosi José Ramos-Horta

21 de Janeiro de 2020, 22:46

Eis-Prezidente Repúblika, José Ramos-Horta, hatete ona iha loron-tersa ne'e katak laiha ema ida iha Timor-Leste maka iha interese ba eleisaun antesipadu sira, hatudu konfiante katak lideransa nasional sei hatene ultrapasa krizi polítika atual ne'ebé mosu tanba xumbu hosi Orsamentu Jeral Estadu (OJE) nian.


"Laiha interese ba ema ida, ba nasaun, atu iha eleisaun antesipadu foun sira. Ha'u hanoin katak ne'e la sai hanesan kestaun ida", afirma hosi José Ramos-Horta iha deklarasaun sira ba Lusa, iha Díli.

"Ha'u iha konfiansa maka'as katak entre Prezidente Repúblika [Francisco Guterres Lu-Olo], Xanana Gusmão, Mari Alkatiri, Taur Matan Ruak ho Mariano Sabino, líder sira hosi partidu sira ho reprezentasaun maka'as no esperiénsia sira, sei hetan lalais solusaun ida", nia hatete.

Iha kauza maka solusaun hosi krizi polítika ne'ebé mosu tanba xumbu, iha loron-sesta, hosi Orsamentu Jeral Estadu (OJE) ba tinan 2020, rezulta hosi votu sira kontra ho abstensaun sira hosi Congresso Nacional da Reconstrução Timorense (CNRT), partidu boot hosi Aliansa Mudansa ba Progresu (AMP), koligasaun Governu nian.

Taur Matan Ruak, xefe Governu, hatete, hafoin reuniaun iha loron-segunda ho Prezidente, Francisco Guterres Lu-Olo, katak AMP "la ezisti ona" hafoin xumbu.

Prezidénsia Repúblika sei hahú iha semana ne'e hodi rona partidu sira ho líder nasional sira seluk, antes Konsellu Estadu, no Taur Matan Ruak fó instrusaun, iha loron-tersa ne'e, atu membru sira Governu nian kumpri nafatin sira nia knaar ho normalidade.

Kona-ba kontinuasaun hosi Taur Matan Ruak nu'udar xefe Governu, Ramos-Horta afirma ona katak hosi konstituisaun no mós ho rejeisaun OJE nian, primeiru-ministru "tenki kontinua iha funsaun sira".

"Labele husik funsaun sira to'o Prezidente Repúblika ho konsulta ho partidu sira ne'ebé iha fatin iha parlamentu no karik ho Konsellu Estadu, bele hato'o alternativu sira", nia defende.

"Alternativa sira ne'e tenki esplora agora daudaun. Liuliu iha ideia foun sira hosi koligasaun ne'ebé bele mosu no atu hato'o ba Prezidente figura foun ida nu'udar primeiru-ministru", konsidera mós.

Ramos-Horta rekorda ona katak parlamentu "kontinua lejitimu", la disolve no, tanba ne'e, "depende hosi partidu sira ho fatin iha parlamentu atu halo proposta ida ba Prezidente" kona-ba ezekutivu nia futuru.

Nia insisti ona katak solusaun ne'e tenki "garanti maioria iha parlamentu no konsege konvense Prezidente katak sei garanti estabilidade governativu, katak la'ós hanesan koligasaun ida hosi ezekutivu foun".

La komenta eventual opsaun sira, Ramos-Horta hatete katak importante maka "asegura maioria absoluta" no hatudu "ba Prezidente katak hanesan koligasaun ida ne'ebé sei dura hodi labele akontese situasaun ida ne'ebé akontese agora".

Entre kestaun sira iha bazu hosi krizi atual maka ke~staun katak Prezidente Repúblika la fó pose - liutiha fulan 19 hafoin ezekutivu Taur Matan Ruak nian simu pose - ba membru Governu hamutuk na'in sanulu resin, maioria hosi CNRT, ne'ebé kontinua sub-reprezentadu iha ezekutivu maski hanesan partidu boot koligasaun nian.

"Ha'u la hatene katak hanesan loos ka la'e katak primeiru-ministru Matan Ruak la defende maka'as direitu sira hosi membru sira Governu nian ne'ebé maka hili hosi koligasaun. Maski iha fulan hirak ikus ne'e iha deskonfiansa, la'ós hanesan segredu, kona-ba ne'e", nia hatete.

"Prezidente mantén nafatin postura infleksivel ida hodi lakohi fó pose ba naran sira ne'ebé hato'o. No nune'e hamosu akontesimentu oioin", nia hatete.

Pozisaun ida ne'e halo parlamentu xumba vizita sira hosi Prezidente ba estranjeiru no kria ona "ambiente kontaminadu ida ho atake sira hosi AMP, maibé kona-ba CNRT, ba Prezidente" ho "atake pesoal sira", inklui ba Fretilin no ba líder Mari Alkatiri.

"Ambiente sai kontaminadu maka'as. Infleksibilidade hosi Prezidente ne'e bele mantén. Ne'e katak: bainhira iha proposta foun ida hosi koligasaun ho CNRT, ne'ebé CNRT mantén naran rejeitadu sira, oinsá?", nia kestiona.

Ramos-Horta hatete katak kestaun hosi portura Prezidente nian - "ne'ebé maka ha'u la konkorda ona no ha'u labele konkorda" - labele ignora tanba hanesan "orijen hosi problema balun".

Nia hatete katak agora "ema ruma tenki asumi responsabilidade ba konsekuénsia sira iha ekonomia nasional, iha ema sira nia situasaun", nune'e hanesan importante atu líder prinsipal sira hosi nasaun nian hetan solusaun ida.

"Tenki hasoru malu lalais no ho ulun-malirin, haluha no tau ba kotuk hirus sira no atake pesoal sira ho polítiku sira, tau dahuluk nasaun nia interese sira, rezolve situasaun", nia afirma.

Nasaun nia futuru iha tempu badak depende hosi solusaun lalais ida no krizi bele sai hanesan teste boot ida hosi lideransa nian.

"Ha'u hatete beibeik katak ami laiha krizi, tanba iha instituisaun sira ne'ebé funsiona no orsamentu. Kriz ho Governu ne'ebé la operasional la hanesan. Maibé agora ami tama iha krizi ida ne'ebé bele sai hanesan teste boot ida hosi lideransa", nia afirma.

"Bainhira líder timoroan sira konsege rezolve lalais krizi ne'e, liuhosi konfigurasaun polítika foun ida governasaun nian, Timor nia prestijiu aumenta. Laiha konflitu armadu ida, situasaun iha nasaun tomak hanesan totalmente kalma, laiha provokasaun hosi violénsia".

Ramos-Horta hatete katak kleur ona maka ema husu kona-ba nia eventual partisipasaun iha solusaun ida, opsaun ne'ebé nia lakohi, maski iha disponibilidade hodi fó apoiu bainhira husu ba nia.

"Ha'u la hanoin atu fila ba ezekutivu ida. Maski hanoin katak Governu sei dura de'it tinan ida, lahó buka kolabora no ha'u prontu atu fó apoiu no ha'u sei halo nafatin iha nível pesoal, informal ka ofisialmente", nia hatete.

Lusa

 


Comentários

Critério de publicação de comentários