Pájina aktualizada iha 15:13h, sabado 29 Fevereiru

MNE ko'alia krizi polítika ho grupu diplomátiku akreditadu iha Díli

22 de Janeiro de 2020, 01:32

Ministru Negósiu Estranjeiru husik, iha loron-tersa ne'e, ba diplomata akreditadu sira iha Díli mensajen "serenidade" nian hodi afirma katak ezekutivu kontinua governa ho normalidade, maski iha xumbu ba Orsamentu Jeral Estadu (OJE) nian.


Dionísio Babo konvoka ona, iha loron-tersa ne'e, diplomata sira ho responsável sira hosi organizmu internasional sira ne'ebé akreditadu iha Díli hodi haktuir kona-ba situasaun polítika atual nasaun nian, oras balun hafoin primeiru-ministru, Taur Matan Ruak, husu ba ezekutivu hodi kumpri nafatin sira nia funsaun ho normalidade.

Iha kauza maka solusaun hosi krizi polítika ne'ebé mosu tanba xumbu, iha loron-sesta, hosi Orsamentu Jeral Estadu (OJE) ba tinan 2020, rezulta hosi votu sira kontra ho abstensaun sira hosi Congresso Nacional da Reconstrução Timorense (CNRT), partidu boot hosi Aliansa Mudansa ba Progresu (AMP), koligasaun Governu nian.

Taur Matan Ruak, xefe Governu, hasoru malu, iha loron-segunda ho Prezidente, Francisco Guterres Lu-Olo, no afirma ba jornalista sira katak AMP "la ezisti ona" hafoin xumbu.

Fonte diplomátika sira ne'ebé ko'alia ba Lusa esplika ona katak enkontru iha MNE serve ba governante husik mensajen ida serenidade no konfiansa nian, repete katak prosesu agora iha Prezidente Repúblika nia liman, ne'ebé sei rona forsa polítika sira ho sosiedade sivil.

Iha enkontru, Babo hatete katak Governu kumpri hela nia funsaun sira "ho normalidade", aplika rejimi duodesimal.

Babo esplika katak situasaun seguransa iha nasaun kalma hela no iha normalidade nia laran.

Governu konsidera katak hahú konta, dezde loron-sesta, períudu loron 60 ne'ebé defini iha Konstituisaun ba aprovasaun hosi Orsamentu Jeral Estadu (OJE) nian, hotu, no bainhira kontinua laiha solusaun, sei nakloke nafatin dalan ba eleisaun antesipadu.

Diplomata sira kestiona ministru kona-ba asoetu sira hanesan impaktu hosi situasaun iha projetu sira Governu nian no situasaun finanseiru ezekutivu nian, no materia sira seluk.

Prezidente Repúblika hahú iha loron-kinta rona partidu sira ne'ebé iha fatin iha parlamentu no reprezentante sira hosi sosiedade sivil.

Francisco Guterres Lu-Olo konsidera nesesáriu "vontade polítika ho abertura" hosi ema tomak hodi hetan solusaun ida ba situasaun polítika iha nasaun.

"Prezidente Repúblika konvida líder sira hosi partidu sira ne'ebé iha fatin iha parlamentu hodi rona sira nia ideia ho proposta sira ba solusaun sira kona-ba situasaun polítiku-konstitusional atual", refere iha komunikadu.

Lu-Olo sei rona mós eis-titular sira ho entidade sira seluk, jurista sira, reprezentante sira hosi konfisaun relijiozu sira ho sosiedade sivil.

"Prezidente Repúblika fiar katak ami sei hetan solusaun di'ak ba povu no Estadu Timor-Leste nian", hatutan iha komunikadu.

Lusa

 


Comentários

Critério de publicação de comentários